LRT isi. Nazarbaevanyń uly men Jaqsybekovtyń qandaı qatysy bar?

Astana LRT isi boıynsha aıyptalýshy Qanat Sultanbekov óziniń kinásizdigin málimdedi. Bul týraly ol áleýmettik jelidegi paraqshasynda jazdy.

– Men eshqandaı uıymdasqan qylmystyq top qurǵan joqpyn jáne LRT, BRT qurylysyna qatysty aqshany urlaǵan joqpyn. Bul aqshadan bir teńge de alǵan emespin, — dedi Sultanbekov.

Ol 2009 jyldyń qazanynan 2014 jyldyń jeltoqsanyna deıin Astana ákiminiń orynbasary bolyp jumys istegenin, al 2016 jyly ákimdik olardy Astana Bankine aýystyrǵannan keıin LRT qurylysyna bólingen $257 mln joǵalǵanyn atap ótti.

Sultanbekovtyń aıtýynsha, fransýz seriktesteri Eýropadaǵydaı jer ústi tramvaıyn iske qosýdy usynǵan, biraq Nur-Sultan qalasynyń burynǵy ákimi Imanǵalı Tasmaǵambetov LRT-ny Dýbaıdaǵydaı jol ótkeline qoıýdy talap etken.

– 2013 jyly tuńǵysh prezıdent Nursultan Nazarbaev jobany toqtatty "Tasmaǵambetov jobany arzandatý maqsatynda el basshylyǵyn LRT jobasyn BRT (syıymdylyǵy joǵary avtobýstary bar jeke bólingen jeliler) etip ózgertýge, ıaǵnı estakadadaǵy tramvaıdy avtobýs jelilerine aýystyrýǵa kóndirdi". 2014 jyldyń kúzinde Astana qalasynyń ákimi bolyp Ádilbek Jaqsybekov taǵaıyndaldy.

– Sol jyly Astananyń jańa ákimi Jaqsybekov meni uly Dáýrenge jiberdi, ol barlyq kóliktik jobalardan, sonyń ishinde LRT jobasynan aqsha ákelýdi talap etti. Men bas tarttym, jumystan shyǵýǵa týra keldi.

2014 jyldyń jeltoqsany. Men ákimdikten ketip, ornyma Nuráli Álıev (Darıǵa Nazarbaevanyń uly – red) keldi. Jaqsybekov (Ádilbek Jaqsybekov 2014 jyly Astana ákimi bolǵan - red) el basshylyǵyn LRT jobasyna qytaılyq tehnologııamen qaıta oralýǵa sendirdi. Qazir "salynyp jatqan", dálirek aıtqanda, qatyp qalǵannyń bári Jaqsybekov pen Álıevtiń jasaǵan jobasy, – dep jazdy Sultanbekov jelide.

Sonymen qatar ol qytaılyq ınvestısııanyń 257 mıllıon dollary joǵalǵanyn, Qytaıda LRT isi boıynsha birneshe adam sottalǵanyn atap ótti.

– Sol jyly Másimovtiń Qytaıǵa sapary aıasynda LRT-ny qytaılyq kompanııalar salady degen shartpen halyqaralyq nesıe tartyldy. 2016 Qytaıdyń LRT-ǵa arnalǵan 257 mıllıon dollar aqshasy keıinnen belgisiz sebeptermen bankrotqa ushyraǵan Astana bankine aýdarylyp, LRT qurylysy toqtap qaldy.

Bul aqshanyń qaıda ketkenin bank shottarynda anyqtaý óte ońaı, biraq tergeý muny istemeıdi. Prezıdent Toqaev 2019 jyldyń jeltoqsanynda (Deutsche Welle) Qytaıda LRT jobasy boıynsha adamdardyń sottalǵany týraly habarlaǵany esimde. Men jumystan shyǵarylǵannan keıin 2 jyldan soń paıda bolǵan LRT-niń qytaı nusqasyna meniń ne qatysym bar?, – dep jazdy Sultanbekov.

Sultanbekov LRT emes, BRT-ge qatysy bar adamdar sotta bolǵanyn aıtty.

– Sondyqtan, bárin óz atymen ataý kerek: BRT jobasy boıynsha sot LRT-ge "tuzdyq" retinde ótti, biraq LRT jobasy boıynsha eshkim jaýapqa tartylmaıdy, tergeý júrgizilmeıdi, 257 mıllıon dollar izdelmeıdi. Ákimder men Úkimet músheleriniń eshqaısysynan múlde jaýap alynǵan joq. Biraq negizgi sheshimderdi solar qabyldady, — dep jazdy ol.