Jańa júıege kóshý qarqyn aldy

Shymkent qalasynyń Abaı aýdany aýmaǵynda 453 kópqabatty turǵyn úı bar. Onyń ishinde 374 kópqabatty turǵyn úı kondomınıým nysany retinde ádilet basqarmasynan tirkeýden ótti.

Aýdanda kondomınıým obektisi retinde tirkeýden ótken kópqabatty turǵyn úılerde múlik ıeleriniń birlestigin (MIB) jáne jaı seriktestik (JS) qurýǵa baılanysty turǵyndarǵa túsindirý jumystarynyń medıa jospary bekitilip, bul boıynsha turaqty jumystar júrgizilýde.

Osyǵan oraı, búgingi tańǵa deıin aýdan ákimshiliginiń uıymdastyrýymen kópqabatty úılerde MIB jáne jaı JS qurýdyń tıimdiligin túsindirý maqsatynda turǵyndarmen 521 jınalys uıymdastyryldy. Sonyń nátıjesinde, 374 kópqabatty turǵyn úıdiń kelisim hattamasy jasalyp, turǵyn úı kólemine shaqqanda ol 76,6 paıyzdy qurap otyr. Onyń ishinde, 289 kópqabatty turǵyn úıde jaı seriktestik, 58-inde múlik ıeleriniń birlestigi qurylyp, qalalyq ádilet departamentinde tirkeldi. Sondaı-aq ótken aptada kópqabatty turǵyn úı turǵyndarymen 27 jınalys ótkizilip, hattamalaryn túzildi.

Búgingi tańǵa deıin Ál-Farabı aýdan ákimshiliginiń uıymdastyrýymen kópqabatty úılerdi basqarýdyń jańa nysanyna kóshý boıynsha turǵyndarmen 493 jınalys uıymdastyryldy. Nátıjesinde, 53 kópqabatty turǵyn úıde múlik ıeleriniń birlestigi qurylyp, qalalyq ádilet departamentinde tirkeldi. Sondaı-aq, 225 turǵyn úı jaı seriktestikke ótti. Qosymsha múlik ıeleriniń birlestigin qurý boıynsha 33 kópqabatty turǵyn úıdiń kelisim hattamasy jınaqtalýda.

Qazirgi tańda, Qarataý aýdany aýmaǵynda MIB jáne JS-ni túsindirý boıynsha turǵyndarmen 78 kezdesý, 16 onlaın jınalys uıymdastyryldy. Aýdan boıynsha 9 MIB jáne 280 JS quryldy. Sonymen qatar, túsindirme jumystary nátıjesinde qalǵan kópqabatty úılerden hattamalar jınaqtalyp jatyr.

Eńbekshi aýdanynda qazirgi ýaqytta 630 kópqabatty turǵyn úıdiń altaýynan MIB, 296-nan JS túrindegi kelisim men 42 bas tartý hattamalary jınaqtaldy. Sonymen qatar, jalpy 503 úıge túsindirý jumystary júrgizildi. Bıylǵy jyldyń 10-21 qazan aralyǵynda Eńbekshi aýdany ákimi apparatynyń mamandary tarapynan 70 kópqabatty turǵyn úıge túsindirý jumystary atqarylyp, qol jınaý úshin turǵyndarǵa hattamalar berildi.

Á.Nurjigituly