“Maska taqpaıdy, toı ótkizedi”. Bekshın koronavırýstyń tórtinshi tolqyny týraly aıtty

Almaty qalasynyń bas sanıtar dárigeri Jandarbek Bekshın 20-39 jas aralyǵyndaǵy adamdardyń koronavırýs ınfeksııasyn tez juqtyratynyn málim etti. Aıtýynsha, halyqtyń bul sanatynyń vaksınalaný belsendiligi tómen jáne karantın rejımin jıi buzady. 

J. Bekshın atap ótkendeı, epıdemıologııalyq zertteýlerdiń nátıjeleri boıynsha juqtyrý 20-39 jas aralyǵyndaǵy azamattarda – 31,2%, 40-59 jastaǵylarda –24%, 60 jastan asqan qart adamdarda – 23%.

– Sońǵy aptada ınfeksııa juqtyratyn negizgi oryndar burynǵysha saýda obektileri – 34%, otbasylyq baılanys – 19,5%, qoǵamdyq kólikter – 17,8%, – dedi qalanyń bas sanıtar dárigeri.

Sonymen qatar ol koronavırýstyń "tórtinshi" tolqyny aıaqtalmaǵanyn, biraq tómendeı bastaǵanyn, sondyqtan vaksına saldyrý qarqynyn arttyrý qajet ekenin eske saldy.

– Almatylyqtar qyraǵylyqty tómendetti, maska taqpaıdy, toı ótkizedi. Azamattar derttiń qanshalyqty qaýipti ekenin túsinýleri tıis. Ásirese 60 jastan asqan adamdar qaýip tobynda. О́ıtkeni, ólim kóbinese halyqtyń osy sanatynda bolady. Jasyna qaraı kóptegen adamdarda sozylmaly aýrýlar, dert juqqan kezde olar órshı túsedi. Sondyqtan remıssııa kezeńinde vaksınalaný qajet. Tek vaksınalaný ǵana koronavırýsty jeńetin bolady, — dedi J. Bekshın.

Bas sanıtar dárigerdiń aıtýynsha, COVID-19 vırýsynyń "úndi" nusqasy tez juǵady ári patogendiligi áli de óte joǵary. Sonyń saldarynan "sımptomdy" naýqastardyń deńgeıi 95%-dy quraıdy. "ýhandyq" – 50% jáne "brıtandyq" – 81%.