"BUU-ǵa deıin baramyz". Janbolat Mamaı sot sheshimine baılanysty málimdeme jasady

Belsendider Janbolat Mamaı men Inga Imanbaı Nur Otan partııasy tóraǵasynyń birinshi orynbasary Baýyrjan Baıbektiń shaǵymy boıynsha ótken azamattyq sot sheshimine baılanysty baspasóz konferensııasyn ótkizdi. Baspasóz jıynynyń barysyn tómendegi materıaldan kórýge bolady.

Búgin Nur Otan partııasy tóraǵasynyń birinshi orynbasary Baýyrjan Baıbektiń talap aryzy boıynsha Almaty qalasy Áýezov aýdandyq №2 sotynda ótken azamattyq-prosessýaldyq proseste sýdıa Raıhan Sartaeva shaǵymdanýshy tarap paıdasyna sheshim shyǵarǵan.

Sýdıa "belsendiler fılmdegi aıyptaýlarǵa birde-bir dálel usynbady, fılmdegi málimetter shyndyqqa janaspaıdy" dep málimdedi.

Sot sheshimine saı jaýapkerler belsendi erli-zaıypty Janbolat Mamaı men Inga Imanbaı "Baýyrjan Baıbektiń Almaty qalasy ákimi bolyp turǵan kezdegi jemqorlyq áreketteri týraly" delingen eki tildegi fılmdi Demokratııalyq partııa youtube arnasynan óshirýge, ol jerde aıtylǵandardy teristeýge, shaǵymdanýshy taraptyń 438 201 teńge kólemindegi sotqa ketken shyǵynyn óteýge mindetteldi.

Belsendi Janbolat Mamaı sottyń materıaldardy óshirý týraly sheshimi oryndalmaıtynyn, appelıasııalyq shaǵym túsiretinin aıtty.

B.Baıbek-J.Mamaı teketiresi belsendiniń NurOtan partııasy tóraǵasynyń orynbasary týraly eki tilde vıdeomaterıal jarııalaýynan bastalǵan. Janbolat Mamaı ol jerde UZUN Qulaq telegram kanalynda, ashyq derekkózderde, birqatar baspasóz betterinde jarııalanǵan aqparattardy, derekterdi negizge alyp, B.Baıbekti Almaty ákimi bolyp turǵanda "bıýdjet aqshasyn "jep" mıllıarder atandy" dep aıyptaıdy. Buǵan jaýap retinde B.Baıbek NurOtan partııasynyń eks-depýtaty, búginde youtube jelisinde vıdeoblog túsirýmen aınalysyp júrgen Táńirbergen Berdońǵarǵa suhbat berip, oppozısıonerdiń aıyptaryn teristep, ony sotqa beretinin málim etti. Munan soń Janbolat Mamaı Qazaqstan soty ózin jyǵyp beretinin aıtyp, Baıbekti tikeleı efır rejıminde ashyq debatqa shyǵýǵa shaqyrǵan. Uzamaı NurOtan partııasy atynan májilis depýtaty atanǵan Elnur Beısenbaev Qazaqstan arnasynyń jýrnalısi Nartaı Aralbaıulynyń youtube arnasyna suhbat berip, Janbolat Mamaıdyń Baýyrjan Baıbekti debatqa shaqyrýyn synap, Mamaıdyń ózin debatqa shaqyrady. Buǵan jaýap retinde Mamaı debatqa basqa-basqany emes, óziniń sózderin "ótirik" degen, sotqa beretinin aıtqan Baýyrjan Baıbekti shaqyrǵanyn jetkizgen.

Daıyndaǵandar; Melis Seıdahmetov, Álı Álesh, Móldir Ablahat