Foto: Ǵabıt Nurhanulynyń facebook paraqshasynan
Anestezıolog-reanımatolog Ǵabıt Nurhanuly Nur-Sultan qalasyndaǵy Kópbeıindi medısınalyq ortalyqtaǵy qyzmetinen negizsiz bosatylǵanyn málimdegennen keıin ózine qoqan-loqy kórsetilgenin habarlady.
Pandemııa boıy áleýmettik jelide vırýstan saqtaný joldary týraly tushymdy aqparat berip, qoǵamǵa ashyqtyǵymen tanylǵan Ǵabıt Nurhanuly buǵan deıin facebook-te dárigerlik esepti qazaqsha bergeni úshin ortalyq dırektorynyń ınfeksııalyq aýrýlar boıynsha orynbasary Tatıana Sechoeva qyr sońyna túsip alǵanyn, aqyrynda "rotasııa jasaımyz" dep jumys grafıgine qospaǵanyn jazǵan. Alaıda kóp uzamaı dáriger jazbasy óshirilgen. Qamshy tilshisimen sóılesken Ǵabıt Nurhanuly muny "jazba qyzý talqylanyp, kópshilik kóńil aýdara bastaǵanda quqyq qorǵaý organy qyzmetkerleri habarlasyp, máseleni shý shyǵarmaı sheship beretinderin aıtyp, jazbany óshirýdi surady" dep túsindirdi. Artynsha "Tatıana Sechoevanyń týysy" delingen áriptesi Vıtalıı Kalına qońyraý shalyp, "shýlatýdy toqtatpaǵan jaǵdaıda áńgime basqasha bolady" dep qoqan-loqy kórsetkenin aıtady. Dáriger "Tatıana Sechoevamen aramyzdyń sýýyna o basta qazaqsha sóıleýim sebep boldy" dep sanaıdy.
Sondaı-aq ol Tatıana Sechoevanyń "koronavırýs gospıtalinde adam uzaq jumys isteı almaıdy. Qyzyl aımaqta kóp júrgen mamanǵa rotasııa jasalady nemese bir aı demalýy kerek. Keıin jumysqa kirise alady. Muny kez kelgen kásibı kadr biledi" degen sózin teriske shyǵarady.
– "Rotasııa" degen syltaýmen unamaǵan adamyn shyǵaryp, ornyna adam alady. Qaıta qyzyl aımaqta kóp júrgen adamda ımmýnıtet qalyptasady, eger jańa adam alyp kelse, ol aýyryp qalýy múmkin. Qyrkúıek aıynan beri bizde birde-bir medısına qyzmetkeri arasynda aýrý tirkelmedi. Bári – istep júrgen eski brıgada. Meniń jumysymdy bastaǵanyma 5 aı boldy, eń sońǵy kelgenderdiń birimin. Kóbine istep júrgenderge 7-8 aı bolǵan, – deıdi Ǵabıt Nurhanuly.
Dáriger qyzmetinen bosatylǵany týraly buıryq joq ekenin, biraq jumys kestesine de qospaı otyrǵany aıtady. "Olar grafıkke engizilmegenimmen kelispeı, óz erkimmen jumystan ketkenimdi qalap otyr", – degen maman qazirgi tańda basqa jumys qarastyryp júrgenin jetkizdi. Sondaı-aq "keıde ádiletsizdikpen alysyp sharshaǵansha, shetelge ketip, tynysh ómir súrmeımin be" degen oı keletinin de jasyrmady.
Qamshy tilshisimen sóıleskende Ǵabıt Nurhanulynyń daýsynan qobaljý baıqaldy. "Aıtqandarym ózime kesirin tıgize me" degen úreı bar sııaqty. Solaı ma?" degen saýalǵa "olar mafııa ǵoı, biraq osyǵan bola óltirip tastamaıtyn shyǵar" dep tutqany qoıýǵa asyqty. Degenmen áńgime sońynda aıtqandaryn jarııalaýǵa kelisti.
Ǵabıt Nurhanuly esimderin ataǵan Tatıana Sechoeva telefon tutqasyn kótermese, Qamshy tilshisiniń qońyraýyna jaýap bergen Vıtalıı Kalına pikir bildirýden bas tartty.
Al Nur-Sultan qalasy qoǵamdyq densaýlyq saqtaý basqarmasynyń basshysy Tımýr Muratov eńbek kodeksi men kásiporynnyń ujymdyq kelisim-sharttarynda qyzmetkerlerdi bir orynnan ekinshi orynǵa aýystyrý bar norma ekenin, soǵan sáıkes Ǵabıt Nurhanulyna reanımasııa bólimine aýystyratyny habarlanǵanyn jetkizdi.
Sondaı-aq basqarma basshysy Ǵabıt Nurhanulynyń "Tatıana Sechoeva medısına ortalyǵyna týysqandaryn jumysqa ornalastyrǵany, jumysqa qabyldaý barysynda til, din, ult sekildi erekshelikterge nazar aýdaratyny" týraly aıtqandaryn joqqa shyǵardy.
Tımýr Muratov Ǵabıt Nurhanuly jeke basqa nuqsan keltirgen nemese quqyqty buzǵany týraly naqty dálelder bolǵan jaǵdaıda, tıisti quzyrly organdarǵa júginip, ony dáleldeýge quqyly ekenin eskertti.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir