Facebook-te daý: Qyzmetkerler kompanııanyń bylyǵyn ashty

Álem boıysha 200-den asa Facebook jumysshysy keńsede jumys isteýge májbúr. Facebook basshylyǵy koronavırýs órship turǵan ýaqytta jumysshylaryn keńsege qaıtyp oralýyn talap etken. Qyzmetkerler buǵan narazylyqtaryn bildirip ashyq hat jazdy, dep habarlaıdy Qamshy.kz aqparat agenttigi BBC-ge silteme jasap.

Qyzmetkerler qashyqtan jumys isteýge ruqsat berip, pandemııaǵa baılanysty jalaqylaryn kóbeıtýdi surap otyr.

Facebook jumysshylardyń kóbi úıden jumys istep jatqanyn aıtady.

– Álemdik kontentti baqylaýshy 15,000 adam úıden jumys isteıdi jáne pandemııa aıaqtalǵansha qashyqtan jumys isteı bermek, – deıdi kompanııa basshylyǵy.

Kompanııa qyzmetkerleri bul aqparatty joqqa shyǵardy. Facebook jumysshylaryna 2021 jyldyń jazyna deıin úıden jumys isteýge ruqsat etkenine qaramastan keńsede jumys isteýge májbúrlep otyrǵanyn aıtady.

Ashyq hatta zań buzatyn jazbalardy anyqtaıtyn jasandy ıntellekt jumysynda kinárat shyqqannan keıin jumysshylardy keńsede jumys isteýge májbúrlep otyrǵany jazylǵan.

“Kontent moderatorlar úıden jumys istegennen keıin Facebook heıt pen jalǵan aqparat taralmaýy úshin bizdiń densaýlyǵymyz ben ómirimizdi qaterge tigip keńsege oralýǵa májbúr etýde” dep jazady jumysshylar.

Bul hat kompanııa ishindegi keleńsizdikterden habar beredi. Mark Zýkerbergtiń maqsaty – moderatorlardyń basyn qosyp platformaǵy barlyq máseleniń sheshimin tabý. Jasandy ıntellekttiń basty mindeti – balaǵat sóz nemese balaǵa jasalǵan zorlyq-zombylyq týraly kontentti avtomatty túrde buǵattaý. Facebook-tiń aıtýynsha, mundaı jazbalardyń 95%-y belgi salynbaı turyp anyqtalady. Kompanııa erejesine qaıshy keletin jazbany anyqtaý ońaı. Dese de ony buǵattaýda másele týyndap otyr. Máselen, dúısenbide Kamala Harrıstiń násiline qatysty rassıstik jazba jarııalanǵany anyqtaldy. Facebook ony óshirý qajet materıal retinde belgilegenimen bir apta ótese de óshirilmegen. Bul jasandy ıntellektiń jumysy qajetti deńgeıde jumys istemeıtinin bildiredi.

Facebook basshylary jumysshylardyń keńsede koronavırýs ınfeksııasyn juqtyrtpaýy úshin qaýipsizdik sharalary men  medısınalyq kómek kórsetý máselesi qarastyrylǵanyn aıtady. Medısınalyq anyqtamasa barlar ǵana úıden jumys isteı alady. Qalǵan jumysshylar  densaýlyǵyna qaýip tóngenine qaramastan jumysqa shyǵýǵa qosymsha aqy tóleýin jáne jaldamaly jumysshylardy shtatqa alýdy talap etýde.   

Olardyń aıtýynsha, kontent moderator jumysy Facebook-tegi psıhologııalyq turǵyda eń aýyr jumys. Sebebi olar zorlyq-zombylyq, onyń ishinde balaǵa zorlyq kórsetý sekildi kontentpen jumys isteıdi. Pandemııa kezinde mundaı jazbalardyń sany artqan.

Ashyq hat Facebook basshysy Mark Zýkerbergke, bas maman Sherıl Sendberg pen basqa da kompanııa basshylaryna baǵyttalǵan. Hat Anglııanyń Foxglove atty zańgerlik kompanııasymen aqyldasyp jazylǵan. 170 adam aty-jónin kórsetpeı hatqa qol qoıdy. Ashyq hat Makr Zýkerbergtiń Vashıngton zańgerleri tarapynan qatań synǵa ushyraǵannan keıin bir kún ótpeı kelgen.

Pandemııa kezinde Facebook qana emes basqa da úlken kompanııalar jumyskerlerdi keńsede jumys isteýin talap etip, jumysshylar tarapynan qatań synǵa ushyrap otyr. Máselen, Amazon qoımasynda jumysshylarǵa múlde jaǵdaı jasalmaǵany jáne qaýipsizdik sharalary qarastyrylmaǵany týraly shý shyqty.