Kópbalaly analardyń járdemaqysy qysqaratyny ras pa?

2021 jyly tórt balaly analardyń járdemaqysy qysqarady degen aqparattyń ras-ótirigi anyqtaldy. Bul týraly Eýrazııa arnasy habarlady.

Arnanyń málimetinshe, áleýmettik jelide 2021 jyly tórtinshi balasyn dúnıege ákeletin analar kópbalaly analardyń sanatyna jatpaıdy degen alyp-qashpa áńgime taraǵan. Áńgimeniń ras-ótirigin anyqtaý úshin eńbek mınıstrligine hat joldap, mán-jaıdy anyqtaǵan.

Eńbek jáne halyqty áleýmettik qorǵaý mınıstrligi, áleýmettik kómek departamenti dırektorynyń orynbasary Asqar Nııazov halyqtyń resmı aqparattarǵa ǵana sený keregin aıtty.

– Resmı aqparttarǵa ǵana súıenýge, senýge shaqyramyn. Jalǵan aqparat taratpańyzdar. Bul baǵytta meniń aıtarym – kópbalaly otbasylardy áleýmettik qamsyzdandyrý máselesi. 2000 jyldyń basynan kele jatqan júıeni alyp tastaý qaralǵan joq. О́zderińiz bilesizder, bıylǵy jyldan bastap, otbasynyń quramyndaǵy bala sanyna qaraı áleýmettik tólem júıesin dıfferensıaldy túrde taǵaıyndaýdy júzege asyrdyq, – dedi ol.

Mınıstrliktiń málimetinshe, elimizde kópbalaly otbasylarǵa arnalǵan járdemaqyny 400 myńǵa jýyq otbasy aldy. Al 1 shildeden bastap kópbalaly otbasylar mólsheri ózgertilgen járdemaqyǵa qol jetkizgen. 

– Mysaly, ótken jyldary otbasylarǵa jalpy tólenetin aqshanyń kólemi 10 500 teńgeni qurap otyrdy. Qazirgi tańda 4 balasy bar otbasyǵa 44 500 teńgeniń kóleminde járdemaqy beriledi. 5 balasy bolsa, 55 myń teńgen kóleminde tólenedi. Ár bala saıyn 11 myń teńge kóleminde qosymsha aqy qosylyp otyrady. Járdemaqy besinshi, altynshy, jetinshi balamen shektelip qalyp jatqan joq. Tipti segizinshi baladan bastap, ár balaǵa 4 MRP-dan qosymsha tólenedi, – dedi Nııazov.