Ázerbaıjannyń Qazaqstandaǵy elshisi: Halqymyz 30 jyl boıy uıatqa qalyp keledi (vıdeo)

Búgin Qazaqstan saıası zertteýler qaýymdastyǵy Ázerbaıjannyń Qazaqstandaǵy elshisi Rashad Mamedovpen kezdesý uıymdastyrdy.

Sharaǵa Qazaqstan saıası zertteýler qaýymdastyǵynyń prezıdenti Esenjol Alııarov, "Qamshy.kz" aqparat agenttiginiń jetekshisi Bilál Qýanysh, "Abai.kz" aqparattyq portalynyń bas redaktory Nurgeldi Ýsbanov, saıasattanýshylar Rasýl Jumaly, Islam Kýraev, Qazbek Beısebaev, Ashat Qasenǵalı, Aben Daýren, Shyńǵys Aınabolov qatysty.

Jıynda moderator bolǵan belgili saıasattanýshy Aıdos Sarym shara Taýly Qarabahtaǵy qaqtyǵysqa baılanysty naqty ári senimdi aqparatty tikeleı sol eldiń ókilinen alý úshin uıymdastyrylǵanyn jetkizdi.

 – Ázerbaıjan – biz úshin baýyrlas el. Taýly Qarabahtaǵy jaǵdaı tóńireginde álemde túrli-túrli aqparattyq shabýyl jasalyp jatyr. Aqparatty tikeleı alý múmkindigin qarastyrǵymyz keldi. Sol sebepti Ázerbaıjannyń Qazaqstandaǵy elshisimen kezdesý ótkizý týraly usynysymyzdy Rashad Mamadov myrza qabyl aldy. Búgingi sharada jabyq taqyryp joq, elshi myrza barlyq suraqqa jaýap beredi, – dedi saıasattanýshy Aıdos Sarym.

Moderatordan keıin sóz alǵan elshi aldymen qoldaý bildirip jatqan baýyrlas Qazaqstan eline alǵysyn bildirdi. Artynsha, Ázerbaıjannyń tarıhyn baıandap, eldiń aýmaqtyq erekshelikteri men terrıtorııasy jaıly egjeı-tegjeıli aqparat usyndy.  Onyń aıtýynsha, Ázerbaıjan halqy Taýly Karabahtan aıyrylyp qalyp, 30 jyl boıy uıatqa qalyp keledi. 

– Bizdiń elimizdi aıyptap jatqan elder birde-bir dálel kórsete almaı jatady. Fransııanyń prezıdenti Makronnyń "Ázerbaıjanda orta shyǵystan kelgen jaldamalylar soǵysyp jatyr" dep málimdedi. Bizdiń prezıdent Makron sózine jaýap beretini nemese keshirim suraıtyny jaıly habarlaǵan bolatyn. Sol kúni telefon arqyly sóılesip kelisimge keldi. Ázerbaıjan – óz ekonomıkasyna 250 mıllıard dollar quıǵan el. Bul qyrýar qarjy. Aýmaǵy bizden 36 ese kóp Qazaqstannyń ózi táýelsizdik alǵannan beri ekonomıkasyna 300 mıllıard dollar quıǵan. Aıtqym kelgeni, Ázerbaıjan – postkeńestik elderdiń ishindegi táýelsiz saıasat júrgizetin jalǵyz el, – dedi elshi.