Ázerbaıjan Armenııanyń qaıtadan shabýyl bastaǵanyn habarlady

Ázerbaıjan Respýblıkasynyń Qazaqstandaǵy elshiligi Ázerbaıjan men Armenııa syrtqy ister mınıstrleriniń Máskeýde ótken kezdesýi nátıjesinde qol jetkizilgen 2020 jyldyń 10 qazan kúni saǵat 12:00-den bastap atysty gýmanıtarlyq maqsatta toqtatý rejımin ustaný kelisimine qaramastan, Armenııanyń qarýly kúshteri kelisimdi óreskel túrde buzýdy jalǵastyryp jatqanyn habarlady.

Elshilik taratqan málimetke saı, atysty gýmanıtarlyq maqsatta toqtatý rejımi kúshine ene salysymen, Ázerbaıjannyń Agdam jáne Terter aýdandary Armenııa qarýly kúshteri tarapynan zeńbirek oǵyna ushyraǵan. Arada birneshe saǵat ótken soń Armenııanyń qarýly jasaqtary Gadrýt jáne Jábraıl baǵytynda shabýyl áreketin jasaǵan.

"Armenııa qarýly kúshteriniń Sýgovshan aýmaǵynda armıan soldattarynyń máıitin jınap júrgen aq tý tigilgen sanıtar mashınasyn atqylaýy nátıjesinde bir medısınalyq qyzmetker aýyr jaraqat aldy.

11 qazan túni maıdan shebinen alys ornalasqan, kólemi boıynsha Ázerbaıjannyń ekinshi úlken qalasy Gıanjaǵa Armenııa qarýly kúshteri raketalyq shabýyl jasady. Shabýyl nátıjesinde 7 adam qaza taýyp, 34 adam jaraqat aldy, aralarynda balalar da bar.

Atysty gýmanıtarlyq maqsatta toqtatý týraly kelisimnen keıin Armenııa qarýly kúshteriniń beıbit turǵyndar men qalalarǵa oq jaýdyrýy varvarlyqtyń ta aıqyn mysaly bolyp tabylady, al Armenııa basshylyǵynyń atysty toqtatýǵa shaqyrýy ekijúzdiliginiń aıǵaǵy" delingen aqparattyq habarlamada.

Elshilik Armenııanyń beıbit turǵyndarǵa, úılerge, azamattyq obektilerge jáne medısınalyq qyzmetkerlerge Ázerbaıjanǵa qarsy agressııa saıasaty sheńberinde qasaqana oq jaýdyrýy – eldiń halyqaralyq gýmanıtarlyq quqyq jáne Jeneva konvensııalarymen birge halyqaralyq quqyqtyń negizin qalaýshy normalardy elemeıtinin, óz mindetterin sózsiz buzatynyn jáne gýmanızmniń negizgi qaǵıdattarynan múldem alys ekenin taǵy bir márte kórsetetinin atap ótti.

"Armenııa tarapynan jasalǵan agressııa aktilerin qatań túrde aıyptaımyz jáne halyqaralyq qoǵamdastyqty basqynshy el Armenııany halyqaralyq quqyq pen halyqaralyq mindetterdi ustanýyna májbúrleý maqsatynda batyl qadamdar jasaýǵa shaqyramyz.

Aýmaqtaǵy ahýal jaýapkershiligi Armenııanyń áskerı-saıası basshylyǵynyń moınynda" dep habarlady Ázerbaıjannyń Qazaqstandaǵy elshiligi.