15 Qyrkúıek, 2020 Áleýmet

Úsh qarjylyq pıramıda basshylary shamamen 22 mıllıard teńgeni jymqyrǵan

Foto: Qamshy.kz

"Garant 24 Lombard", "Vygodnyı zaım" jáne "Estete lombard" qarjylyq pıramıdalaryna qatysty ishki ister mınıstrligine jábirlenýshilerden 17 myńnan astam ótinish kelip túsken. Keltirilgen materıaldyq shyǵyn 22 mıllıardtan astam teńgeni qurady. Bul týraly ishki ister mınıstrligi tergeý bóliminiń bastyǵy Sanjar Ádilov vedomstvo paraqshasyndaǵy onlaın brıfıng barysynda málimdedi.

Osy uıymdardyń basshylaryna qatysty 32 qylmystyq is tirkeldi. 51 kúdikti qylmystyq jaýapkershilikke tartyldy, jeti kúdiktige izdeý jarııalaǵan.

Ábdilov kúdiktilerden 70 mıllıon teńgeden astam qolma-qol aqsha alynǵanyn, tergeý barysynda kúdiktilerdiń eki mıllıard teńgeden astam múlki tabylyp, tárkilengenin jáne qamaýǵa alynǵanyn aıtty.

Buǵan deıin naýryzda "ESTATE Lombard" JShS dırektory Áset Ysqaqov Qyrǵyzstannan, sáýir aıynda "Garant 24" kompanııasynyń negizin qalaýshy Aslan Myrzabekov Moldovadan ekstradısııalandy. Maýsymda pıramıda jasaýshylardyń biri Sergeı Frolov Máskeýde ustalǵan bolatyn.

Jalpy, qarjylyq pıramıdalardy qurýǵa baılanysty qylmystyq ister sany birneshe esege ósken.

Ishki ister mınıstrliginiń málimetteri boıynsha, aǵymdaǵy jyldyń basynan bastap mınıstrlikte qarjy pıramıdalaryn uıymdastyrý boıynsha 217 qylmystyq is tirkelgen. Onyń ishinde 116 qylmystyq is sotqa joldandy, barlyǵy 79 kúdikti qylmystyq jaýapkershilikke tartylýda. Qazirgi ýaqytta ishki ister mınıstrliginiń tergeý basqarmasy túrli qarjylyq pıramıdalarǵa qatysty 13 qylmystyq isti tergep jatyr...

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir