11 Shilde, 2020 NEWS

Qytaı elshiligi pnevmonııany "Qazaqstan vırýsy" dep ataǵan

Sýrette: Qazaqstandaǵy Qytaı elshisi Chjan Sıao

Qazaqstandaǵy Qytaı elshiligi elde taraǵan pnevmonııany "Qazaqstan vırýsy" dep ataǵan. Bul týraly Qamshy tilshisi brıtanııalyq Daily Mail basylymyna silteme jasap habarlaıdy. 

Brıtanııalyq basylymnyń jazýynsha, Qazaqstandaǵy Qytaı elshiligi "Qazaqstanda ólim kórsetkishi koronavırýstan da joǵary, qaýipti vırýs tarady" degen málimdeme jarııalaǵan kezde, bastapqyda "qazaqstandyq pnevmonııa vırýsy" dep jazǵan. Keıinirek bul tujyrymdamasyn "COVID emes pnevmonııa" dep ózgertken. 

Al aǵylshyn tilinde shyǵatyn qytaılyq Global Times basylymynyń aqparatynsha, elshiliktiń málimdemesinen keıin keıbir qytaılyq sarapshylar pnevmonııanyń Qytaıǵa taralýyn boldyrmaý úshin sharalar qabyldaý kerek ekenin aıtyp, Qazaqstan men Qytaıdyń soltústik-batysyndaǵy Shyńjańnyń shektesetinin eskertken. 

Qytaı elshiliginiń "Qazaqstanda koronavırýstan da qaýipti vırýs taraldy" degen málimdemesinen keıin Batys BAQ-tary "Ortalyq Azııa elinde ólim kórsetkishi koronavırýstan joǵary jańa vırýs paıda boldy" degen mazmundaǵy aqparattardy jarysa jarııalaǵan

Bul aqparattar Qazaqstannyń densaýlyq saqtaý mınıstri Alekseı Soıdyń "2020 jyldyń alǵashqy jarty jyldyǵynda pnevmonııadan 1172 adam qaıtys boldy" degen málimdemesinen keıin paıda boldy. Alekseı Soı keltirgen derekke sensek, pnevmonııadan qaıtys bolǵandar koronavırýs óliminen bes esege kóp, sebebi resmı statıstıka boıynsha qazirge deıin Qazaqstanda COVID-19-dan kóz jumǵandar sany 264.

Al 3 shilde kúni QR bas sanıtar dárigeri Aıjan Esmaǵambetova 2020 jyldyń alǵashqy alty aıynda 1772 adamnyń, maýsymda 628 adamnyń pnevmonııadan qaıtys bolǵanyn aıtqan. Bul esep boıynsha, pnevmonııadan kóz jumǵandar COVID-19-dan qaza tapqandardan 7 ese kóp.

Resmı statıstıka boıynsha, pnevmonııadan qaıtys bolǵandardyń sany COVID-19-dan kóz jumǵandardan bes ese, tipti, jeti esege deıin kóp bolýy, árıne, álemniń nazaryn Qazaqstanǵa aýdarady. Tipti, keıbir elderde "Qazaqstannan abaılańdar, ol memlekette koronavırýstan da qaýipti jańa vırýs paıda boldy" degen eskertýler bastalyp ketken.

Alaıda osy aqparattardan keıin Londonda shyǵatyn Daily Mail basylymy brıtanııalyq jáne qytaılyq epıdemıologtardan suhbat alyp, medısınalyq mamandar Qazaqstanda taralǵan pnevmonııany shyn máninde COVID-19 dep sanaıtynyn jarııalaǵan.

Beıjińdegi Qytaıdyń bas epıdemıology jáne Ulybrıtanııa Ýorvık ýnıversıtetiniń vırýsology Qazaqstanda taralyp jatqan "belgisiz pnevmonııany" epıdemıologııalyq turǵydan COVID-19 dep tujyrymdaıtynyn jetkizgen. 

Qazaqstandyq neırohırýrg dáriger Myńjylqy Berdiqojaev "pnevmonııadan qaıtys bolyp jatqan adamdardyń 99 paıyzynyń ólimine koronavırýs sebep" dep aıtqan.

Al juma kúni Dúnıejúzilik densaýlyq saqtaý uıymy Qazaqstandaǵy "belgisiz pnevmonııany" is júzinde anyqtalmaǵan COVID-19 dep málimdegen

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir