09 Shilde, 2020 NEWS
Fotony túsirgen avtor
Natalıa Jarıneva shırek ǵasyrdan beri Almatydaǵy Keńsaı-1 zıratynda beıitterge kútim jasaýmen aınalysady. Aram shópterdi julady, gúl egedi, mármár tastardyń, granıttiń tazalyǵyn qadaǵalaıdy. Munysy – bir jaǵynan ermek, ekinshi jaǵynan – kúnkóris qamy.
Natalıa Vasılevna beıit basyna gúl otyrǵyzyp jatyr
Natalıa Vasılevna 1959 jyly Almatydaǵy Tastaq yqshamaýdanynda týǵan. 1973 jylǵa deıin óziniń týǵan atasynyń basqa adam ekenin, ultynyń tatar ekenin bilmeı kelipti.
– Otbasymyz qalaı barǵany belgisiz, jas kezinde atam Qytaıdaǵy azamattyq soǵysqa qatysyp, sol jaqta qaıtys bolypty. Artynda áıeli men 4 jastaǵy balasy, inisi qalǵan. Ol kezde Qytaıdan qaıtý qıyn bolǵan kórinedi. Qaıtar kezinde úılengenderge asa shúılikpeıdi eken. Sondyqtan kishi atamyz ájemizge úılenip, aǵasynyń balasyn, ıaǵnı bizdiń ákemizdi baýyryna basypty. Keıin dám-tuzdary jarasyp, úı bolyp ketken. Atamyz ulyn da, bizdi de janyndaı jaqsy kórdi. Alaıda qupııalary týraly "eshkimge tis jarmaımyz" dep sheshken. Tek ájemiz dúnıeden óterde, 1973 jyly bar bilgenin aıtyp ketti. Ákemniń shyn aty Vasılıı emes, Ravıl eken. Biz tatar ultynan bolyp shyqtyq, – degen Natalıa Jarıneva otbasylyq syrdyń erterek ashylmaǵanyna ókinedi. Sol kezdegi oqıǵadan bar bileri osy ǵana.
Zırat kútýshisiniń jastyq shaǵy Almaty mańyndaǵy Jalǵamys aýylynda ótken. Ákesi qora-qopsy ustaǵysy kelgendikten, aýylda turýdy jón sanapty. Mektepti, artynsha qazirgi Qabanbaı batyr men Naýryzbaı batyr kósheleri qıylysyndaǵy medısınalyq ýchılısheni bitirgen. Oqýdy támámdaǵanda Reseıdiń Chıta oblysyndaǵy áskerı bólimshede jumys isteýge joldama berilipti. Alaıda Almatydan ketkisi kelmeı, osynda qalyp qoıǵan. Kelesi joldama Túrksib sanatorııine berilip, ol jerde shıpajaı jabylǵanǵa deıin medbıke bolyp jumys isteıdi. Artynsha №12 qalalyq aýrýhananyń travmatologııa bólimine aýysqan. Keıin ekinshi qyzynyń syrqatyna baılanysty jumysty qoıyp, úıde otyrýyna týra kelgen.
– Uzaq jyldan beri osy Keńsaı jaqta turyp kelemiz. Eki qyzym bar. Tuńǵyshymyz qazir turmysta. Qazaq jigitke kúıeýge tıgen. Bizge eki nemere syılady. Ekinshi qyzym Regına 7 jasynda trombosıtopenıkalyq pýrpýra syrqatyna shaldyqty. Úıden óz betinshe shyǵa almaıdy. Denesin jaralap alsa, jaranyń jazylýy uzaqqa sozylady. Murny jıi qanaıdy. Úıden basqa jerde murny qanasa, toqtatý qıyn. Qyzym úshin jumysty tastadym. Qyzym úıden shyqpaıdy. Mektep kezinde muǵalimder úıge kelip oqytty. О́zi bilimdi. Túrli kýrstar oqyp, qarjy salasy boıynsha maman atandy. Aǵylshyn tilin biledi. Tek úıden basqa jaqta ózin jaıly sezinbeıdi. Múgedektigi boıynsha járdemaqy alady. Kúıeýimiz ekeýmizde zeınetaqy bar. 26 jyldan beri úıdiń janyndaǵy zıratqa kútim jasap, qosymsha tıyn-teben tabam, – dep Natalıa Jarıneva bul jumysqa qalaı kelgenin, tanymal adamdarmen qalaı tanysqanyn aıtyp berdi.
Aıtýynsha, birde zırat mańynda serýendep júrgeninde belgisiz jigit jaqyndap, jón surasqan soń ara-tura anasynyń beıitine kóz qyryn salyp, shóbin otap, kútim jasap turýyn ótingen. Onysy úshin aı saıyn aqy tólep turatynyn aıtqan. Bul 1996 jyl bolatyn. Al jaqyndaǵan jigit – belgili kınorejısser, qazaq derekti kınosynyń negizin qalaýshy, Qazaq KSR-nyń halyq artısi Oraz Ábishevtiń uly Qanat Ábishev.
Oraz Ábishev pen Marýa Shyntasovanyń zıraty
Sodan beri Natalıa Jarıneva zıratqa kún saıyn barady. Ony zırat qyzmetkerleri túgel tanıdy. Beıit basyna jıi keletin almatylyqtardyń da oǵan kózi úırengen. Arasynda belgili adamdar da az emes. О́ziniń sózinshe, ánshi Ermek Serkebaevpen kórisken saıyn qaljyńdasyp, jaqsy qarym-qatynasta bolǵan. "Ermek Serkebaev óte ázilqoı jan edi" dep eske alady ol.
Sondaı-aq keıipkerimiz akademık, taǵamtanýshy Tóregeldi Sharmanovpen de jaqyn aralasady.
Natalıa Jarıneva 2005 jyly Keńes Odaǵynyń batyry, Halyq qaharmany, armııa generaly Saǵadat Nurmaǵambetovpen tanysqan. Ol batyrdyń zaıyby Lıra Nurmaǵambetovanyń zıratyn da qaıtys bolǵan kezinen beri óz kútimine alǵan. Byltyr ǵana batyrdyń nemeresi jastaı dúnıeden ótipti. Ol da osy jerde jerlengen.
Saǵadat Nurmaǵambetov pen Lıra Nurmaǵambetovanyń zıraty
Natalıa Jarıneva Saǵadat Nurmaǵambetov ataǵy men dańqyna qaramastan óte qarapaıym, kóńili kirshiksiz taza, kez kelgen adammen jaqynyndaı sóılesetin kishipeıil bolǵanyn aıtady. Halyq qaharmany marqum áıeliniń basyna ár juma saıyn kelip turýǵa tyrysypty.
Kútýshi "Saǵadat Nurmaǵambetov pen Lıra Nurmaǵambetovaniki sekildi, Oraz Ábishev pen Marýa Shyntasovalardikindeı mahabbat qazir joq" dep sanaıdy. Ol "burynǵy kezde birin-biri shynaıy súıetin, birine-biri adal juptar kóp bolǵan" degen pikirde.
Natalıa Jarıneva marqumdar kisiligi mol adam bolǵanyn, tirshilikte jaqsy syılasqandyqtan olardyń zıratyna bar peıilimen kútim jasaıtynyn jetkizdi. О́ziniń sózinshe, Saǵadat Nurmaǵambetovtyń qyzy men Oraz Ábishevtiń uly kútýshi qyzmetine dán rıza. Bolashaqta da qyzmetin paıdalana berýge nıetti.
Zırat tazalyqshysy Keńsaı-1 beıitinde aldyn ala alynyp qoıylǵan jer bolmasa, bos oryn joq ekenin, sondyqtan munda jerleý rásiminiń jıi bolmaıtynyn, dúnıeden qaıtqandar Keńsaı-2 zıratynyń qoınyna tapsyrylatynyn aıtty. Zırat ákimshiligindegiler qabir qazýshy, tas qalaýshy sekildi qyzmetkerlerimen suhbattasýǵa ruhsat bermedi. "Basshylyq ruhsat bermese, suhbat bere almaımyz. Basymyz ekeý emes" degen Keńsaı-2 zıratyndaǵy qabir qazýshylar tek sońǵy ýaqytta qaıtys bolǵandardyń kóbeıgenin, keıde tipti jerleý rásiminiń qas qaraıǵansha jalǵasatynyn jetkizdi.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir