Aq úı: Gonkong máselesine baılanysty Qytaıǵa sanksııa salýymyz múmkin

"Eger Beıjiń Gonkong avtonomııasyn baqylaýdy kúsheıtetin ulttyq qaýipsizdik zańyn qoldansa, AQSh úkimeti Qytaıǵa sanksııalar salýy múmkin" dep málimdedi Aq úıdiń ulttyq qaýipsizdik boıynsha keńesshisi Robert O’Braıen. Bul týraly Qamshy tilshisi CNBC-ge silteme jasap habarlaıdy. 

O’Braıenniń aıtýynsha, zań jobasy Gonkongty basyp janyshtaýdy bildiredi, "Sonyń saldarynan AQSh memlekettik hatshysy Maık Pompeo qalanyń avtonomııalyq erekshe orny bar ekendigine kepildik bere almaıdy. Bul Gonkongtaǵy adam quqyqtary jáne demokratııa týraly 2019 jyly qabyldanǵan zańǵa sáıkes Qytaıǵa sanksııalar engizýge muryndyq bolady" dedi O’Braıen.

Pompeo Qytaıdyń ulttyq qaýipsizdik týraly jańa zań jobasyn Gonkongtyń avtonomııasy úshin «ólim túıini» dep atady. Al, O’Braıen Gonkong jahandyq qarjy úshin basty hab mártebesinen aırylýy múmkin ekenin eskertti.