"Jumysqa barýym kerek edi". Almaty-Talǵar tasjolyna qoıylǵan blokbekettegi ahýal (fotoreportaj)

Koronavırýsqa baılanysty karantınge jabylǵan Almaty qalasynyń basqa oblystarǵa qatynaıtyn joldaryna qoıylǵan 27 blokbeket 19 naýryz saǵat 00.00-de jumysyn bastady. Qazir arnaıy blokbeketterde qalaǵa kirýshiler men shyǵýshylardy qatań tekserip jatyr. Qamshy tilshisi Almatyǵa jaqyn ornalasqan, biraq qalaǵa emes, Almaty oblysyna qaraıtyn Talǵar aýdanyna aparatyn negizgi jolǵa qoıylǵan blokbekettegi ahýaldy kórip qaıtty.

Almatyǵa Qulja tasjolynan kele jatqan avtokólikter kire alatyn qýys joldardyń birine qoıylǵan blokbekette jol tolyqtaı jabylǵan. Bul joldan avtokólikterdi de, adamdardy da ótkizbeıdi. Jol ústine betondar qoıylyp, polısııa qyzmetkerleri kelgen adamdardy qaıtaryp jatyr. 

Al Talǵar tasjolyna aparatyn negizgi jolda jaǵdaı qarbalas. Munda qalaǵa kirýge de, qaladan shyǵýǵa da asyqqandar kóp. Qaladan shyǵatyn kólikter men adamdarǵa tyıym salynbaǵanymen, kirgisi kelgenderdi qatań tekserip jatyr. Almatyǵa qaraı tek qalada tirkelgen, biraq belgili sebeptermen karantın bastalǵanda qala syrtynda qalǵan adamdar ǵana kirgizilip jatyr. Al Almatyda jumys isteıtin, biraq qalaǵa emes, Almaty oblysyna qaraıtyn aýdanynda turatyndardy blokbeketten jibermeı tur. Qalaǵa kirýge kezekte turǵandardyń kóbisi sondaı adamdar. 

Almatydan shyǵyp bara jatqan kólikter

Almatydan shyǵyp bara jatqan adamdar

Polısııanyń tekserýinen keıin Almatyǵa kirgizilip jatqan kólikterBlokbekette turǵan áskerı tehnıka

Blokbekettegi jaǵdaıdy polısııa men arnaıy jasaq ókilderi baqylap tur

Almatyǵa kirý úshin kezekte turǵan adamdardyń qujatyn ákimdik ókilderi tekserip jatyr

Qalaǵa kirýge asyqqandardyń kóbi "Jumysqa barýym kerek edi" degendi aıtady