04 Naýryz, 2020 NEWS

Maman koronavırýstyń mamyr aıynda joıylatyny týraly taraǵan aqparatqa pikir bildirdi

Osyǵan deıin álemdi alańdatqan juqpaly aýyrýdyń mamyr aıynda joıylatyny týraly áleýmettik jelilerde aqparat taraı bastaǵan bolatyn. Tipti, bul máselege qatysty BAQ betterinde koronavırýstyń ýltrafıoletke tótep bere almaıtyny, sondyqtan mamyr aıynda tolyq joǵalatyny týraly da aıtylǵan. Alaıda bul aqparattyń jańsaq tusy bar bolyp shyqty.

Foto: ashyq aqparat kózderinen

Bul týraly Ortalyq kommýnıkasııalar qyzmetinde Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Lıýdmıla Bıýrabekova aıtty.

Lıýdmıla Bıýrabekovanyń sózinshe, bul koronavırýstyń mamyr aıynda joıylatyny týraly suhbat bergen mamannyń ózi suraqty jańsaq túsingen: 

"Epıdemııalyq jaǵdaı boıynsha bul boljam qısynǵa kelmeıdi. Suhbat bergen mamannyń ózi ıntervıýdyń telefonmen júrgizilgenin, suraqty jańsaq túsingenin moıyndady. Sondyqtan, osyndaı boljam aıtqan. Shyn máninde, biz de boljamdar jasap otyrmyz. Biraq sáýirde nemese mamyr aıynda dep naqty eshteńe aıta almaımyz", – deıdi L. Bıýrabekova. 

Osylaısha, atalǵan komıtet tóraǵasy koronavırýstyń naqty joıylý ýaqytyn aıta almaǵanymen, ózderi tarapynan da boljamdar jasalyp jatqanyn jasyryp qala almady.

Al qoǵamda kún raıynyń jylynýyna baılanysty juqpaly vırýs órship ketpeı me degen alań da joq emes. Oǵan sebep, ótkir derttiń kóbine jyly jaqtarda kóbirek órship bara jatqany bolyp otyr. Ázirge bul másele tóńireginde naqty málimdeme jasalǵan joq.

Eske sala keteıik, qazirgi ýaqytta álemde COVID-19 vırýsyn juqtyrǵandar sany 90 893 adamǵa jetip, odan 3110 adam qaıtys bolǵan.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir