Baýyrjan Baıbek: Qoǵamda dıalog bolmasa, senim de bolmaıdy

Partııa Tóraǵasynyń Birinshi orynbasary Elbasynyń strategııalyq bastamalary men Memleket basshysynyń tapsyrmalaryn júzege asyrý aıasynda Úkimet 2026 jylǵa deıin aýyldardy qoldaý úshin 2 trıllıon teńge bólýdi kózdep otyrǵanyn aıtty. 2021 jylǵa qaraı 3477 aýyldy jańǵyrtyp, aýyz sýmen qamtyp, áleýmettik ınfraqurylymdardy jaqsartyp, joldy jóndeý men qurylys jumystaryna aıryqsha kóńil bólýdi josparlap otyr.

«Búgin sizdermen ataýly mereke – Qazaqstan Respýblıkasynyń Tuńǵysh Prezıdenti kúni qarsańynda júzdesip otyrmyz. Bul qazaqstandyqtar úshin erekshe mereke. Táýelsizdik jyldarynda Elbasy etnıkaaralyq kelisimniń biregeı úlgisin jasady, bir mılıonnan astam qazaqtar tarıhı otanyna oraldy. Nursultan Nazarbaevtyń arqasynda bizdiń barlyq shekaramyz shegendeldi. Qysqa ýaqyt ishinde elimiz qajetti naryqtyq reformalardy júzege asyrdy. Eger de 90-shy jyldary qazaqstandyqtardyń 30%-ynyń turmys-tirshiligi nashar bolsa, qazir bul kórsetkish 4,6%-ǵa deıin tómendedi», - dep atap ótti Baýyrjan Baıbek.

Partııa Tóraǵasy Birinshi orynbasarynyń aıtýynsha, bastaýysh partııa uıymdary «Nur Otan»-nyń - basty tiregi, qozǵaýshy kúshi. Partııanyń belsendi múshelerin jumyldyrý men jańa tulǵalardy tartý maqsatynda 14 óńirde pılottyq rejımde partııalyq kadrlyq rezervke irikteý júrgizildi.

«Eger de qoǵamda dıalog bolmasa, senim de bolmaıdy. Senim joq jerde, bolashaqqa nyq qadam jasaı almaımyz. Sondyqtan Elbasy «Senim. Dıalog.Bolashaqqa nyq qadam» dep atalatyn partııany qaıta jańǵyrtýdyń baǵdarlamasyna bastamashy boldy. «Nur Otan» partııasynyń basty maqsaty – osylardyń basyn biriktirý. Áleýmettik júıeni jetildirip, el qamyn oılap, halyqtyń ómirin jaqsarta túskisi keletinderdi partııaǵa tartý. Búgingi tańda Prezıdent Qasym-Jomart Toqaevtyń tapsyrmasyna oraı óńirlerdi damytýǵa aıtarlyqtaı qarajat bólinýde. Partııa Lıderi Nursultan Nazarbaev aıtqandaı, «Nur Otan» óz tarapynan bıýdjet qarjysynyń jumsalýyna qatań baqylaýdy qamtamasyz etedi», - dedi Baýyrjan Baıbek.

Batys Qazaqtan oblysy, Aqjaıyq aýdanynan kelgen partııalyq Gúlnar Gılmanova óz sózinde táýelsizdiktiń alǵashqy jyldarynda halyqtyń qandaı aýyrtpalyqty basynan ótkergenin tilge tıek etti.

«Adamdardyń jalaqysy keshiktirilip, olar balalaryn qalaı asyraryn, qalaı kıindirerin bilmeı qınaldy. Ýaqyt óte kele qarapaıym halyqtyń jaǵdaıy jaqsara tústi. Erteńgi kúnge degen senim paıda boldy: Biz kúıeýimiz ekeýmiz tórt balany tárbıelip jatyrmyz», - dedi ol.

О́z sózinde Aqmola oblysy, Esil aýdanynan kelgen Bekzat Baımuratov partııalyq kadrlyq rezerv pılottyq jobasynyń talaı jasqa jol ashyp bergenine toqtaldy.

«Men 25 jastamyn. Buryn men partııaǵa nemquraıly qaraıtynmyn. Partııalyq kadrlyq rezervke irikteý bastamasy meniń qyzyǵýshylyǵymdy týǵyzdy. Bizdiń aýdannan ǵana 61 úmitker qatysty, olardyń ishinde men de barmyn. Biz jeti aýylda bolyp, turǵyndarmen kezdesip, olardyń problemasyn tyńdadyq. Endi ony sheshýdiń jolyn birge oılastyramyz», - dedi Berik Baımuratov.