Mańǵystaýlyq qyz-kelinshekter kıiz basýdy úırendi

Mańǵystaý oblystyq mádenıet, tilderdi damytý jáne arhıv isi basqarmasynyń áleýmettik-memlekettik tapsyrysy aıasynda «Altyn oımaq» qolónerdi qoldaý qoǵamdyq qory Mańǵystaý aýdanynyń  ortalyǵy Shetpe selosynda trenıg ótkizdi. Trenıng barysynda qatysýshylar kerege tańǵysh toqıtyn qural-jabdyqtar men boıaý túrlerimen tanysty. Sonymen qatar, tústerdiń úılesimdiligin úırendi. Trenıngti mańǵystaýlyq sheber Kúmis Qosbaı júrgizdi. Qatysýshylar sany 20 adam. Olar 14 jipten shyǵatyn «syńar múıiz» jáne «qus taýdaı» órnegin úırendi. Trenıngke Shetpeden ǵana emes Jetibaı, Tushybek aýyldary men Jańaózen qalasynan qatysýshylar kelip qatysty. «Rýhanı jańǵyrý» aıasynda ótkizilgen sharada trenıngke qatysýshylar oqýdy júndi ázirleý ádistemesinen bastady. Odan keıin taldyrma daıyndaý ádisin jáne ony  oıýdy, qııý jáne qııýlastyrý ádisterin úırendi. Jergilikti qoıdyń júnin sabaýdyń jáne saban shıge  salý ádisimen tanysty. Oıýdy, taldyrmany  qıyp, tekemetti salyp bolǵannan keıin sý sebilip, shıge oralyp 4 adam uzyn arqanmen terbetkende qatysýshylardyń kóńil-kúıi kóterilip án shyrqaldy. Qatysýshylar osy trenıngke qatysyp úırengenderin aıtyp alǵysyn jaýdyrdy.

Baý-basqur toqýdyń 1-shi bólimi kerege tańǵysh toqýdan bastaldy. Sodan keıin jipter kerilip tańǵyshty qurý prosesi júrdi. Árıne 3  kúnde toqyp úlgere almaıtyn bolǵandyqtan qatysýshylardyń barlyǵy úıden toqyp úırenýge berip jiberdi.

Bul is-shara qazaqtyń dástúrli qolóneri - tekemet basýdyń Mańǵystaýǵa tán daıyndalýymen erekshe boldy. Aldymen qoıdyń  suryptalǵan júnderi týlaqta sabalyp, sabalǵan jún shıge salyndy. Juqalaı basylǵan taldyrma oıylyp júnge salyndy.  Taldyrma boıaý ádisi de sol jerde kórsetilip túsinik berildi. Oıý salynyp bolǵannan keıin tekemetke jyly sý quıylyp, shıge oralyp shıdi baılap býyp, uzyn arqanmen 4 adam kıizdi tartýdy bastady. 1 saǵattaı tartylyp, kıizdi bilekteý prosesi kórsetildi.