"Damýdyń" demeýimen kásibin dóńgeletýde

Memleket basshysy Qasym-Jomart Toqaev «Syndarly-qoǵamdyq dıalog – Qazaqstannyń turaqtylyǵy men órkendeýiniń kepili» atty halyqqa arnaǵan Joldaýynda «Shaǵyn, ásirese, mıkrobıznes elimizdiń áleýmettik-ekonomıkalyq jáne saıası ómirinde mańyzdy ról atqarady. Atap aıtqanda, eń aldymen aýyl turǵyndaryna turaqty jumys beredi, jumyssyzdyqty azaıtady. Sonymen qatar salyq bazasyn qurap, jergilikti bıýdjetti nyǵaıtady. Sondaı-aq jappaı kásipkerlikti damytý sanaǵa sińgen paternalıstik pıǵyl men masyldyqtan arylýǵa múmkindik beredi. Elimizde kásipkerlikti damytýdyń úlgi bolarlyq mysaldary jetkilikti. Biz shaǵyn kásipkerlikti búkil qoǵam bolyp qoldaýymyz kerek»,– dep atap kórsetken bolatyn.

Búginde Jambyl oblysynda óz isin ashyp, jeke kásipke bet burǵandardyń qatary kóbeıip keledi. Solardyń biri- Shý qalasynyń turǵyny, «Birjan-Nurdáýlet» jaýapkershiligi seriktestiginiń dırektory Sáýle Qojabekova. Ol osydan eki jyl buryn balabaqsha ashyp, qazirgi tańda 25 adamdy turaqty jumyspen qamtyp otyr.

Sáýle Sansyzbaıqyzy tabys taýyp, asyp-tasyp ómir súrýdiń qamyn kúıttep júrgen jan emes. Árıne, paıda da kerek. Degenmen de keıipkerimizdiń balabaqsha ashýdaǵy eń basty maqsaty-izgilik pen parasattylyqqa jol kórseter irgeli orynda elimizdiń tiregi bolyp tabylatyn jas urpaqqa tálimdi tárbıe berip, sapaly bilimmen qarýlandyrý.

–El úshin ıgiligi bar istiń úlken-kishisi bolmaıdy. Ras, eger ózge saladaǵy ister­di de qolyma alsam, úıirip ketýge bilimim de, ishki qýatym da jeter edi. Al men eń úlken, eń ıgilikti is - bala tárbıesi dep bilemin. Zańǵar jazýshy Muhtar Áýezov «el bolamyn deseń-besigińdi túze» degen joq pa edi? Uly adam bul jerde bala tárbıesin basty másele etip kóterip otyr. Bizdiń táýelsiz elimizdiń tili de, dili de balabaqshadan bastalady. Jas shybyqty qalaı ıseń, solaı ósedi emes pe?

Men áý bastan osy isti júrekpen qaladym. Kópjyldyq armanyma 2017 jyly qol jetkizdim. «Damý» qory arqyly 2017 jyldyń jeltoqsan aıynda 10 mıllıon teńge aldyq. Alǵash ashylǵanda 75 bala qamtylǵan bolatyn. Al qazirgi tańda 100 búldirshin Káýsar», «Sezim», «Erkejan, «Ádemi» toptaryna bólinip, balabaqshada tálim alýda. Bizde balalarǵa barlyq jaǵdaı jasalǵan. О́z qazandyǵymyz bar. Sonymen qatar aýdanda balalardy balabaqshaǵa tasymaldaýdy alǵash bolyp biz bastadyq.

Aldaǵy ýaqytta bul baǵyttaǵy jumysymyzdy odan ármen keńeıtýdi josparlap otyrmyz. Sebebi balabaqsha ornalasqan aýmaqqa halyq keıingi jyldary kóp qonystanýda. Soǵan saı suranys arta túsýde, –deıdi S. Sansyzbaıqyzy.

Bul Sáýle Sansyzbaıqyzynyń kásipkerlik salasyndaǵy alǵashqy qadamy emes. 2007 jyly «Balapan» baǵdarlamasy aıasynda Shý aýdany, Aqtóbe aýylynda «Aqerke» balabaqshasyn ashyp, kópke úlgi bolarlyq is jasaǵan. Endi kásipker ana júrgizip otyrǵan kásibin keńeıtý maqsatynda ekinshi deńgeıli bankter arqyly jeńildetilgen nesıe alýdy josparlap otyr. Aıtýynsha ekinshi deńgeıli bankten 8 mıllıon teńge kelisim kelgen. Sonymen qatar seriktestik basshylary balabaqsha janynan jylyjaı salýdy, sol arqyly búldirshinderdi baqsha ónimderimen qamtamasyz etýdi de kózdep otyr.