"Qosqudyqtyqtar" qudyqtan sý tasymaıdy

Turǵyndardy taza aýyzsýmen qamtý baǵytynda eldi mekenderde de eńserilgen jumys kóp. Máselen Jambyl oblysy Shý aýdany Shý qalasy boıynsha qazirgi tańda 7,0 myńnan astam halyq turatyn «Qosqudyq» alqabynyń sýmen qamtý júıeleri qurylys jobasy ázirlenip, saraptama qaraýyna tapsyrylyp otyr. Jobanyń quny shamaman 300-350,0 mıllıon teńgeni quraıdy. Joba tolyqtaı naqty iske asyrylǵan jaǵdaıda qala turǵyndarynyń 80 paıyzy ortalyqtandyrylǵan sý qubyr júıesiniń ıgiligin kóretin bolady, dep jazady Qamshy.kz aqparat agenttigi.  Budan bólek, birqatar aýyldyq eldi mekenderde bıyl júzege asyrylatyn, qarjysy bólinip qoıylǵan 8 jańa joba boıynsha merdigerler anyqtalyp, jumystary bastalýda. Olardyń qatarynda Baızaq aýdanyndaǵy Talas, Sarykemer, Jýaly aýdanyndaǵy Qarasaz, Talas aýdanyndaǵy Qasqabulaq, Maıtóbe, Sarysý aýdanyndaǵy Igilik, О́ndiris, Shý aýdanyndaǵy Moıynqum, Moıynqum aýdanyndaǵy Qylyshbaı aýyldary bar.

О́tken jyly respýblıkalyq bıýdjet qarajaty esebinen jumystary bastalǵan sýmen qamtý nysandary Qordaı aýdanynyń Qasyq, Talas aýdanynyń Eseıhan, Sarysý aýdanynyń Arystandy jáne Qyzyldıhan, Shý aýdanynyń Abaı aýyldarynda 2019 jyldyń sońynda paıdalanýǵa berilip, atalǵan aýyldar turǵyndary taza aýyz sýdy paıdalanýǵa qol jetkizetin bolady.

Sonymen qatar, oblystyq bıýdjetten Moıynqum aýdanynyń 2017 jyly bastalǵan ótpeli 2 jobasyna (Býrylbaıtal, Mırnyı, Qııaqty eldi mekenderi) bıyl 596,4 mıllıon teńge qarastyryldy, nysan jumystary jyl sońynda aıaqtalyp, paıdalanýǵa beriledi. Jobalar boıynsha paıdalanylatyn sý kózi – Balqash kóli, sý qubyr jelisi arqyly atalǵan eldi mekenderge tazalanǵan aýyzsý jetkiziletin bolady.

Osy jumystar júzege asyrylǵannan keıin, jyl sońyna qaraı aýdandardaǵy 209 aýyl turǵyndary úshin ortalyqtandyrylǵan sý paıdalaný múmkindigi týmaq. Osy merzim ishinde oblys boıynsha turǵyndardyń aýyzsýmen qamtylýy kórsetkishin 56,0 paıyzǵa jetkizý kózdelýde.

Budan basqa, salalyq mınıstrlikke 2020-2022 jyldardaǵy respýblıkalyq bıýdjetten qarjy bólýge 5 aýdannyń 14 aýyldyq eldi mekenine jańa sý qubyr júıeleri qurylysyn salý úshin 7090,2 mıllıon teńgege ótinimder tapsyryldy.

Oblysta aýyz sýmen qamtylmaǵan eldi mekenderdi 2020-2022 jyldary aýyz sýmen qamtý jospary ázirlengen, jergilikti bıýdjet qarajaty esebinen jyl saıyn jobalyq-smetalyq qujattamalar ázirlenip, saraptama qorytyndylary alynǵan soń, qurylys-montaj jumystaryna qajetti qarjy qarastyrý úshin respýblıkalyq bıýdjetke usyný josparlanýda. Sonymen qatar, halyqaralyq qarjy uıymdary, memlekettik-jekemenshik áriptestik, kommýnaldyq kásiporyndar esebinen, basqa da kózderden qarjy izdestirilmek.

О́ńirimizdegi eldi mekenderdi aýyz sýmen qamtý isi oblys ákiminiń turaqty baqylaýynda, osy másele boıynsha jıyndar jıi ótkizilip, múddeli taraptarǵa tıisinshe tapsyrmalar júktelýde.