Ilkimdiniń isi ilgeri

El ekonomıkasy ár iske ıkemi bar, bilimdi jastar arqyly damıdy. Kásip ashyp, is bastaýǵa eshqashan kesh emes. Biraq, eń durysy oǵan erterek ıkemdelý. Elbasy N.Nazarbaevtyń azattyqtyń alǵashqy jyldarynan naryqtyq ekonomıkaǵa bet buryp, kásipkerllik beıimdelý týraly ıdeıasynyń da máni osynda. Memleket basshysy Qasym-Jomart Toqaev ta buqaranyń bıznespen aınalysýyna barynsha jaǵdaı jaǵdaı jasalatyndyǵyn aıtyp otyr. Tipti, Prezıdenttiń Qazaqstan halqyna alǵashqy Joldaýynda osy salaǵa aıryqsha basymdyq berilýi de tegin emes.

Turǵyndardy, onyń ishinde jastardy kásipkerlikke baýlýdyń mańyzy qashanda zor. Osy oraıda M.H.Dýlatı atyndaǵy Taraz Memlekettik ýnıversıtetiniń bastamalary maqtaýǵa turarlyq. Mysaly, «START-U» stýdenttik bıznes-ınkýbatorynyń jastardyń jigerin janyp, qulshynysyn arttyrýǵa tıgizip otyrǵan septigi mol.

Sebebi, munda jastardyń tyń bıznes ıdeıalary týyndap qana qoımaıdy, maqsatqa jetýdiń joldary kórsetiledi, jan-jaqty bilim beredi. Bıznes ınkýbatordyń maqsaty – jastardyń kásipkerlikke qyzyǵýshylyǵyn arttyrý, shaǵyn kásipkerlikti damytýǵa qolaıly jaǵdaı jasaý, jastardyń ınnovasııalyq jáne kreatıvti ıdeıalaryn júzege asyrýǵa qoldaý kórsetý.

–Bizge stýdent-kóshbasshy qajet. Janyp turǵan jastarǵa muqtajbyz. Maqsaty bar, armany bar jasty qoldaýǵa biz árdaıym daıynbyz, - deıdi Enactus Dulaty komandasynyń jetekshisi Ámına Ýálıqyzy. – Mysaly, búginde Enactus Kazakhstan ulttyq ofısine joba-menedjeri qyzmetine shaqyrtý alǵan Karım Súleımenov bizdiń komandaǵa 1-kýrs oqyp júrgen kezden qosylyp, óziniń qabiletin, darynyn kórsetip kóshbasshy dárejesine jetti. Onyń izin basqan stýdentimiz Shahzod Kadyrhodjaev ta bıyl magıstratýrany támamdaǵaly tur. Endi bizdiń komandaǵa kóshbasshy qajet. Qazan aıynan bastap osy baǵytta jumys isteımiz. Janarynda ot jalyndaǵan jastardy árdaıym qoldaýǵa daıyn turatyn ýnıversıtet rektoryna, Enactus Kazakhstan ulttyq ofısiniń dırektory Albına Erjanovaǵa jáne basqa demeýshilerimizge alǵysymyz sheksiz.

Iá, AQSh-tyń San-Hose qalasynda ótken Enactus Álem kýbogynda el namysyn qorǵap, úzdikter qatarynan tabylǵan ýnıversıtettiń komandasy shyn máninde oqý ordasynyń maqtanyshtary. Olardyń oılap tapqan jobalary ármen qaraı jalǵasyn tapsa, áleýmettik turǵysynan da, ekonomıkalyq jaǵynan da tıimdi, paıdaly bolatyny ras. Jýyrda gıdro keshende ótken bıznes forýmda sóz sóılegen Albına Erjanova ýnıversıtet qabyrǵasynda stýdent atanyp, bilim alyp júrgen jastyń aldynda eki jol jatqanyn aıtty. Biri qarapaıym ǵana kúndelikti sabaǵyn oqyp, tapsyrmalardy oryndaý bolsa, ekinshisi oǵan qosa ár túrli uıymdarǵa múshe bolyp, belsendi jastardyń qatarynan tabylyp, óz-ózin shyńdaý. Búginde oqý ordasynda ekinshi baǵytqa ekpin beretin jastarrdyń kóbeıip kele jatqandyǵy qýantady.