• USD 378.65
  • EUR 430.07
  • RUB 6
  • CNY 55.1
18 Qyrkúıek, 14:03:41
Aýyl sharýashylyǵy mınıstrliginiń nazaryna! «Jem shóptiń baǵasy kúıip tur, "Qamshyńa" jazshy», – deıdi ákem

19 Tamyz, 2019 Aımaqtar

Jambylda erekshe jyr keshi ótti

Erkin formattaǵy basqosýdy ótkizýge eshqandaı basqarma da, basqa aǵa da muryndyq bolǵan joq. Júrek dúrsili óleń dep soqqan, óleńge ańsary aýǵan jastar ózderi uıymdastyrdy.

Tarazda jambyldyq aqyndardyń «Avangard» shyǵarmashylyq keshi ótti. Erkin ári erekshe formatta ótken poezııa dýmany jıylǵandardyń kóńilinen shyqty dep jazady Qamshy.kz aqparat agenttigi. 

Móldir óleńdi júrek kózinen ótkizgen jastar kofehanada bas qosty. As iship, aıaq bosatý úshin emes, jyr oqyp, jan sergitý úshin jınaldy. Erkin formattaǵy basqosýdy ótkizýge eshqandaı basqarma da, basqa aǵa da muryndyq bolǵan joq. Júrek dúrsili óleń dep soqqan, óleńge ańsary aýǵan jastar ózderi uıymdastyrdy. Araıly Jaqsylyq degen shynashaqtaı qyz ben Faızýlla Tóltaı degen jas talanttyń janyna zamandastary, aǵa-inileri jıylyp, saýsaqtyń birikse judyryq bolatynyn kórsetti. «Global Coffee» dep atalatyn kofehanaǵa Halyqaralyq «Alash» ádebı syılyǵynyń laýreaty, jazýshy Nesipbek Dáýtaı, oblys ákimi baspasóz qyzmetiniń jetekshisi Nuradın Raqaı bastaǵan ózge de azamattar keldi. Jergilikti basylymdarda júrgen jýrnalıster men poezııaǵa jany adal jandardyń bári de basqosýǵa arnaıy at basyn burdy. Kofehananyń ishi de ádebı atmosferaǵa negizdelipti. Kóne kitaptar, túrli buıymdar ádebıet álemine jeteleı túsedi.

Ádebı keshtiń kirispesinde sóz sóılegen jazýshy Nesipbek Dáýtaı jastardyń bul qadamyna qut tilep, talantty aqyndar shoǵyrlanǵan bizdiń óńirde mundaı keshti ótkizip otyrǵan azamattarǵa rızashylyǵyn jetkizdi. Budan soń oblys ákimi baspasóz qyzmetiniń jetekshisi Nuradın Raqaı sóz alyp, sózden iske kóshken aqyndardyń bul qadamy kóńil qýantatynyn tiline tıek etti.

Esenǵalı Raýshanovtyń «Bolmańyz, tegi, shúbáli» atty óleńinde «Aqyndar aıhaı jyr oqyp, arý qyz kelip gúl qadap...» degen joldar bar. Bul kúni sol kórinis kóz aldymyzǵa kelgendeı boldy. Tarazdaǵy tartymdy keshke arý Almatydan halyqaralyq «Shabyt» festıvaliniń jeńimpazy, talantty aqyn Batyrhan Sársenhan arnaıy kelip, shashyn silkip turyp jyryn oqydy. Jas aqyndar Nurjan Qadiráli, Nurbolat Joldasbek, Araıly Jaqsylyq, Álimjan Shóńgerbaı, Faızýlla Tóltaı, Nurbolat Satymqul, Danııar Álimqul bastaǵan ózge de qyz-jigitter jańa óleńderimen júrekterden jol tapty. «Jaraısyńdar!» destik. Áriptesimiz, oblystyq «Aq jol» gazeti bas redaktorynyń orynbasarynyń mindetin atqarýshy Ashat Raıqul belgili aqyn, Memlekettik «Daryn» jastar syılyǵynyń laýreaty Erlan Júnistiń óleńin oqyp berdi. Qazaqstan Jazýshylar odaǵy oblystyq fılıalynyń dırektory Hamıt Esaman da esti jyrlarymen bólisti. Oblystyq «Araı» jastar gazetiniń tilshisi Murathan Álimhan bastaǵan ózge de jastar gıtaramen jáne dombyramen án shyrqap, ádebı keshti mádenılendire tústi.

Ádebı atmosfera oryn alǵan keshke oblysymyzǵa esimi belgili jastardyń birazy jınaldy. Pýshkın «Poezııa – ápendeleý bolýy kerek»,-depti. Olaı bolýy da zańdylyq shyǵar. Alaıda biz jastardyń boıynan ápendilikten góri zııatkerlikti baıqaı tústik. Jınalǵan jastardyń keıbiriniń janarynan jasyryn romantıkany ańǵardyq. Poezııanyń qudireti sol – aısbergke aınalǵan júrekterdi jibitetindigi. Ásirese, jastardyń janary eshteńeni jasyra almaıdy ǵoı. Júrekterdiń dúrsilinde sezimniń lúpili qylań beretini sodan da bolar... Bul árıne, óleńsúıer qaýymqa qatysty. Áıtpese aqyndaryńyz óleńimen áýre bolyp júrdi bul kúni.

Jastardyń aǵalardy aǵalamaı, baılardy jaǵalamaı ótkizgen bul basqosýy kópshiliktiń kóńilinen shyqqanyna shúbámiz joq. Shyǵystyń shaıyrlary tamsana jyrlaǵan Tarazda osyndaı basqosýlardyń ótip turǵany lázim. Janarynda jalyn atqan jastar jańashyl ispen talaılarǵa úlgi kórsetti. Endi basqarmadaǵylar men basqa jaqtaǵylar oılansa, qup. Izdenistiń izine tússe, qıyn eshteńe joq ekenin qulaqtary kereń, kózderi soqyr bolmasa, kórip otyr ǵoı.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir