Qandaı mamandar jumyssyz qalmaıdy?

Eńbek naryǵyndaǵy jaǵdaı, jumyssyzdyq, jańa salalarǵa mamandaný jaıyn sóz etken «HeadHunter.kz» JShS-niń bas dırektory Nına Bychenkonyń forbes.kz-ke bergen suqbatyndaǵy paıdaly aqparattardy yqshamdap, oqyrmanmen bólisýdi jón kórdik.

Saıttyń 2 mln-nan astam túıindeme, bos jumys oryndary týraly 100 myńnan astam habarlandyrý, 50 myńnan astam kompanııadan turatyn derekter qory belgili bir deńgeıde eńbek naryǵyndaǵy jaǵdaıǵa úńilýge múmkindik beredi.

Nına Bychenkonyń aıtýynsha, jumys berýshilerdiń jumys izdeýshilerge degen talaby birshama ózgergen. Barlyq salaǵa sıfrlandyrý úrdisi batyl enip jatqandyqtan, jumys berýshiler qosymsha daǵdylardy meńgergen, jańa tehnologııalardy jeńil úırenetin, kópqyzmetti qatar atqaratyn, túrli jaǵdaıǵa ıkemdi kadrlardy izdeıdi. Burynǵydaı «jaýapkershiligi mol», «maqsatshyl», «til tabysqysh» degen sııaqty jalpy sıpattar emes, naqty qoldan keletini talap etiledi.

О́z kezeginde jumys berýshilerge qoıylatyn talap ta joǵary. Kompanııalarǵa ózin tórt taǵandap turǵan turaqty etip kórsetý alǵashqy orynǵa shyqqan. О́ıtkeni bilikti kadrlar úshin jumys berýshiniń mártebesi men onyń tartymdylyǵy asa mańyzdy.

Jumys berýshiler arasynda tanymal mamandyqtardyń bestigin satý salasynyń mamandary, esepshiler, ákimshilik personaldar (keńse-menedjeri, hatshy), IT mamandar jáne marketıng salasynda ter tógip júrgender quraıdy.

Búginde adamdardyń 60 paıyzy oqyǵan mamandyqtary boıynsha jumys istemeıdi eken Biraq bir mamannyń ornyn basqa mamandyqtan kelgender almastyryp jatqandyqtan naryqta mamandardyń artyqtyǵy sezilmeıdi. Al óz isiniń bilgirleri men talanttar barlyq salada jetispeıdi.

Saıt keltirgen derekke sensek, túıindemelerin jarııalaıtyndardyń deni jumyssyz júrgender emes, qaıda jaqsyraq jaǵdaı usynady degen oımen basqa jumys oryndaryn izdeýshiler. Sondyqtan 2 mln túıindeme 2 mln adam jumyssyz degendi bildirmeıdi.

Nına Bychenko fýtýrologtardyń keıbir mamandyqtar 10-20 jylda joıylady degen paıymyn teriske shyǵardy. Onyń oıynsha, eski mamandyqtar jańaryp, túrlenip otyrady. Joǵalyp, joıylýy neǵaıbyl. Aıtalyq, jumys berýshiler endigide jaı ǵana marketologqa emes, ınternet-marketolog, sarapshy-marketologtarqa kóbirek qyzyǵýshylyq tanytady.

Iаǵnı, mamandyqqa qatysty qosymsha daǵdy meńgergen, ózgeler bilmegendi úırengen, ózin jetildirip, jańa syndardar súrinbeı óte alatyn maman jerde qalmaıdy deıdi saıt dırektory.