• USD 378.65
  • EUR 430.07
  • RUB 6
  • CNY 55.1
20 Tamyz, 16:22:23
Alpınısterdiń naqty qaı jerde ekeni áli belgisiz

23 Shilde, 2019 Aımaqtar

Jambylda jańa meshittiń qurylysy aıaqtalýǵa jaqyn

Jambyl oblysy Shý aýdanynyń irgesindegi Saýytbek aýylynda osydan birneshe jyl buryn el kútken jarqyn is bastaý alǵan edi. Bir jeńnen qol, bir jaǵadan bas shyǵarǵan aýyl turǵyndary týyp-ósken jerlerine ıman jolynda meshit salýdy kózdegen bolatyn. Endi, mine, kópten kútken atalmysh meshittiń qurylysy da aıaqtalýǵa jaqyn qalypty.

Musylmandy tiline, násiline, ultyna qarap bólmeı, bastaryn bir jerge toǵystyratyn qutty mekenniń qurylysy osydan 3 jyl buryn bastalǵan. Búginde ımandylyq úıiniń qurylysyn túgeldeı óz qolyna alǵan sol aýyldyń týmasy, jeke kásipker Jaqsyǵul Dıqanbaev áýelgide bul iske tutas aýyl jumyla kiriskenin aıtady. «Áý basta ózimizde meshit salatyn oı bolǵan. Shamaly qarajat jınap alýdy kózdegen edik. Sodan aýyldyqtar bir aýyzdan qurylysty bastaımyz degende 100 qap sement alyp berip, irgetasyn qalaǵanbyz. Alaıda, dál osy qalpynda bir jyl ózgerissiz turdy. Araǵa bir jyl salyp, kirpish túsirdik te, qabyrǵasyn qaladyq. Keıinnen bul iske bel sheshe kirisip, qurylysty bastap kettik. О́tken jyly arnaıy adam jaldap, meshittiń ishki-syrtqy árleý jumystaryn jasatqanbyz. Sońǵy 3 aıǵa jýyq ýaqytta qurylys erekshe qarqyn alyp, jumystyń kóbi istelip, azy qaldy. Sátin salsa, qyrkúıek aıyna deıin qurylysty tolyq aıaqtaýdy josparlap otyrmyz. Igi isti bastamas buryn, múftııattan ruqsat alyp, qujattaryn da rásimdep qoıdyq. Tutastaı alǵanda, meshitti salý úshin 15 mıllıondaı qarjy jumsaldy. Onyń ishinde, aýyldan shyqqan azamattar da qarjylaı qoldaý bildirgenin aıta ketý kerek» - deıdi J.Dıqanbaev.

Aýyldyń kireberisinde ornalasqan Asaıyn Shynybekuly atyndaǵy meshit 14 sotyq jerge soǵylýda. Onyń uzyndyǵy 16 metrdi qurasa, eni 10 metr bolady. Aýyldyń rýhanı bolmysyna jańasha serpin beretin sáýleti men sáni kelisken meshitte qulshylyq bólmesi, ımamǵa arnalǵan jeke bólme, tabıǵı gazben jumys isteıtin qazandyq jáne aýladaǵy as berý alańy men dáret alatyn arnaıy oryn qarastyrylǵan.

Osylaısha, 3 ul, 1 qyzdan órbigen 10 nemereniń atasy aýyldastary bastaǵan isti qolyna alyp, ony abyroımen atqaryp keledi. Osyndaıda, qazaqtyń «Aýylyna qarap, azamatyn tany!» degen ataly sózi eriksiz eske túsedi. Rasymen de, ózi týyp-ósken aýylyn óz baspanasyn qamdaǵandaı kem-ketigin túgendep, jyrtyǵyn jamap, turmysyn bazarly etýge bar kúshin jumsaıtyn azamattardyń bar ekeni kóńil qýantady. Jasyratyny joq, bundaı aýyldan berekeniń eshqashan tarqamaıtyny da belgili. Sol sebepti de, jerlesterimizdiń osynaý ıgi isteri ózgelerge de úlgi bolsa eken deımiz. «Igi istiń basyna, jaqsy keler qasyna» degendeı, aýyl halqy úshin jasalyp jatqan ıgi shara berekeli bolsa eken deımiz.

Shapaǵat Qonysbaı

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir