Baýyrjan Baıbek "Nur Otan"-nyń aıtysty qaıta qolǵa alatynyn aıtty

"Nur Otan" partııasy Tóraǵasynyń Birinshi orynbasary Baýyrjan Baıbek jumys saparymen Qyzylorda oblysyna bardy. Sapar barysynda ol partııanyń oblystyq aktıvimen kezdesip, aldaǵy maqsat-mindetterge toqtalyp ótti. Sondaı-aq aımaqtyń belsendi jastarymen arnaıy kezdesip, partııanyń jas býynmen jumysy jańa deńgeıge kóteriletinin jetkizdi.

Konferensııa barysynda Baýyrjan Baıbek ýaqyt ótken saıyn qoǵamda ózgeristerge suranys artyp kele jatqanyn aıtty.

"Halyq qoǵamdyq-saıası ómirge belsendi qatysa bastady. Bul úderiske zamanaýı kommýnıkasııalar da tyń serpin berýde. Jańa saıası tehnologııalar ómirimizdiń ajyramas bir bóligine aınaldy. Bul búkil álemdi qamtyp otyrǵan jahandyq úrdis. Sondyqtan qazirgi tańda osy trendterdi ıgerip, óziniń jumysyn jańa úrdistermen baılanystyra bilgen uıymdar ǵana jetistikke jetedi", – dedi partııa Tóraǵasynyń Birinshi orynbasary.

Osyǵan baılanysty «Nur Otan» partııasy qoǵamdaǵy ózekti máselelerdi áleýmettik jelilerde jan-jaqty talqylaýdan qashpaı, halyqtyń jelidegi pikirine baılanysty jedel áreket etýdi qolǵa alady.

Sondaı-aq Baýyrjan Baıbek partııanyń synaýdy, syndy qabyldaýdy jáne sol arqyly barlyǵyn saraptap, ony óziniń alańynda konstrýktıvti synǵa aınaldyra bilýi kerektigin aıtty.

"Partııa ishinde qoǵamdy tolǵandyratyn ózekti máselelerdiń barlyǵy aıtylýy kerek. Qazaqstandaǵy barlyq saıası partııalardyń, úkimettik emes jáne kásipodaq uıymdarynyń qatysýymen syndarly dıalog keńistigin qurý qajet. Ol tek saıasatty ǵana emes, áleýmettik, ekonomıkalyq, ekologııalyq salalarmen barlyq ózekti máselelerdi qamtýy tıis", – dedi Baýyrjan Baıbek.

Jıyn barysynda aımaqtarda bastaýysh partııa uıymdary men qoǵamdyq qabyldaýlardyń áleýetin tıimdi paıdalaný máselesi de sóz boldy. Olar usynǵan derekter negizinde halyqtyń áleýmettik ahýalyna taldaý jasalyp, sol arqyly áleýmettik saıasattyń basym baǵyttary anyqtalmaq. Mundaı jumystyń jańa ekpin men tyń serpindi talap etetini anyq. Sondyqtan partııa Tóraǵasynyń Birinshi orynbasary áriptesterine úzdik sheteldik tájirıbelerdi kóbirek úırenip, qoldanýdy tapsyrdy.

Baýyrjan Baıbek partııalyq jumys barlyq áleýmettik toppen birdeı júrgizilýi kerektigine de nazar aýdardy.

"Bul iste jobalyq – naqty baǵyttaǵy tásilder qoldanylýy tıis. Jastar, zeınetkerler, múmkindigi shekteýli jandar, áleýmettik az qamtylǵan toptar, kóp balaly analar jáne jumyssyzdarmen tikeleı jumys isteımiz. Qazirdiń ózinde partııanyń naqty toptarǵa baǵyttalǵan jaqsy áleýmettik jobalary bar", – dedi ol.

Budan basqa partııa aldaǵy ýaqytta halyqpen keri baılanysty kúsheıtip, qoǵamdyq qabyldaý jumysyn jetildire túspek. Sondaı-aq sybaılas jemqorlyqpen kúresti kúsheıtý, aqparattyq baǵyttaǵy is-áreketti júıeleý isterine de basymdyq beriledi.

Aıta keteıik, konferensııa kezinde oblystyq partııa aktıviniń biraýyzdan qoldaýymen aımaq basshysy Qýanyshbek Ysqaqov "Nur Otan" partııasy Qyzylorda oblystyq fılıalynyń tóraǵasy bolyp saılandy.

Sapar barysynda Baýyrjan Baıbek Qyzylorda oblysynyń belsendi jastarymen de arnaıy kezdesti. Is-sharada búgingi jas býynnyń negizgi mindetteri, jastardyń el damýyndaǵy róli jáne ulttyq qundylyqtardy dáripteý týraly ashyq áńgime boldy.

Erkin formatta ótken kezdesýde partııanyń jastarǵa qoldaý kórsetý jumystaryn kúsheıtetini de aıtyldy.

"Kez kelgen partııa óziniń bolashaǵy úshin sabaqtastyq dástúrin qalyptastyrý kerek. Sondyqtan Elbasymyz bizdiń aldymyzǵa jastarmen jumysty kúsheıtýdi mindet etip qoıyp otyr. Soǵan oraı biz óz jumysymyzǵa jastardy kóptep jumyldyryp, olardyń qalyptasyp, ósýine jol ashamyz", – degen partııa Tóraǵasynyń Birinshi orynbasary Memleket basshysy aıtqan jas mamandar rezervin jasaqtaýǵa partııa belsene qatysatynyn tilge tıek etti.

Sondaı-aq Baýyrjan Baıbek qazirgi jahandaný jaǵdaıynda árbir ult ózin saqtap qalý úshin kúresip jatqanyna jáne bul rette bizdiń jastarǵa úlken mindet júktelip otyrǵanyna nazar aýdardy.

"Biz táýelsizdik alǵan kezde bolashaǵymyzǵa senimsizdikpen qaraǵandar boldy. Elbasynyń dana saıasatynyń arqasynda biz memleket quryp, búkil álemge ózimizdiń el bola alatynymyzdy dáleldedik. Endi osy eldigimizdi kúsheıtip, óz qundylyqtarymyzdyń aıasyn keńeıtýimiz kerek. Ana tilimiz ben tarıhymyzdy dáriptep, álemdik deńgeıge alyp shyǵý bizdiń mindetimiz. Osy rette jastarymyz belsendilik tanytýy tıis", – dedi "Nur Otan" partııasy Tóraǵasynyń Birinshi orynbasary.

Osyǵan oraı belgili aıtysker aqyn Muhtar Nııazov tól ónerimizdi qoldap, aıtysty qaıta jandandyrý jaıynda óz usynysyn bildirdi. Mundaı usynysty rızashylyqpen qabyl alatynyn aıtqan Baýyrjan Baıbek partııanyń aldaǵy ýaqytta aıtysty qolǵa alyp, onyń damýyna jaǵdaı jasaıtynyn aıtty.

"Partııanyń qoldaýymen endi aı saıyn ár óńirde aıtys uıymdastyrylady. Onyń alǵashqysy kúzde Almatyda ótedi. Aqyndarymyz qoǵamdaǵy ózekti máselelerdi ashyq aıtýy tıis. Biraq barlyǵy konstrýktıvti bolýy qajet", – dedi Baýyrjan Baıbek.

Sonymen qatar ol jastarymyzdyń álemdik ekonomıka men saıasatty meńgerýge umtylýy kerektigin sóz etti. Onyń aıtýynsha, jas qazaqstandyqtar ekonomıkanyń negizgi basymdyqtaryn qazaq tilinde sóıletip, osy saladaǵy álemdik úderisterdiń qyr-syryn úırenýge talpynýy tıis.

Budan bólek, qyzylordalyq jastar óskeleń urpaq arasynda qarjylyq saýattylyqty kúsheıtý, kásipkerlikti úıretý, tárbıelik baǵyttaǵy otandyq mýltıplıkasııany damytý sııaqty mańyzdy máselelerge qatysty naqty usynystaryn jetkizdi.

Sóz sońynda partııa Tóraǵasynyń Birinshi orynbasary jastardy masyldyqqa boı aldyrmaı, kózdegen maqsatqa jetý jolynda aıanbaı eńbek etý kerektigin aıtyp, óskeleń urpaqty Elbasynyń ulaǵatty ómir jolynan úlgi alýǵa shaqyrdy.