Kópbalaly otbasylarǵa 70 páterdiń kilti tabystaldy

Kókshetaý qalasynda kópbalaly, tolyq emes, áleýmettik jaǵynan az qamtylǵan otbasylar men jetimderge 70 páterdiń kilti tapsyryldy dep habarlaıdy Qamshy.kz aqparat agenttigi.

«Saryarqa» shaǵyn aýdanynda ótken sharaǵa Aqmola oblysy ákimi Ermek Marjyqpaev qatysyp, turǵyndarǵa jańa páter kiltin tapsyrdy. Atalǵan túrǵyn úı memlekettik «Nurly jer» baǵdarlamasy boıynsha salynyp otyr.​ Kópqabatty jańa turǵyn úıden baspanaly bolyp otyrǵandar arasynda kópbalaly jáne áleýmettik jaǵynan az qamtylǵan otbasylar, jetimder bar.

«О́ńirde turǵyndardy baspanamen qamtamasyz etý máselesi erekshe nazarda.​ Memleket basshysynyń bastamasymen qolǵa alynǵan  «Nurly jer» baǵdarlamasy Aqmola oblysynda oıdaǵydaı júzege asyrylýda. Munyń bári turǵyndardyń múddesi úshin. О́tken jyly bul baǵytta qyrýar sharýa atqaryldy. Bıyl da sol kórsetkishterge qol jetkizetin bolamyz.  Búgin mine, alǵashqy 70 páterdiń kiltin tapsyryp otyrmyz», - dedi Ermek Marjyqpaev jańa páter ıelerin quttyqtaý sózinde. 

Páter alyp qýanyshqa kelgenderdiń biri, «Altyn alqa» ıegeri, 10 bala tárbıelep ósirgen Svetlana Sádýaqasova QazAqparat tilshisine ózińniń qýanyshymen bólisti.

  

«Páter kezeginde turǵanyma bıyl 14 jyl bolady. 10 bala tárbıelep ósirdim.  Osyǵan deıin páter jaldap turdym. Árıne,  qıyndyqtar boldy. Aqshasyn tóleseńde bireýdiń qas-qabaǵyna qarap júrý ońaı emes. Páter jaldap júrgen kez ben qazirgi jaǵdaıymdy salystyrýǵa bolmaıdy.  Qýanyshymda shek joq. Ana retinde barsha qazaqtandyqtarǵa baspana baqytyn tileımin»,- dedi Batyr ana Svetlana Sádýaqasova.   Sonymen qatar, baspanaly bolǵandardyń arasynda balalar úıiniń tárbıelenýshileri de bar.   «Men balalar úıinen 2010 jyly shyqtym. Sodan beri páter kezeginde turmyn. Qazir óz otbasym bar, eki balanyń ákesimin. О́zimdi baqytty sezinemin. Biraq búginge deıin óz úıim bolǵan joq. Búgin maǵan eki bólmeli páter berdi. Osyndaı ıgi isterge qol ushyn sozyp otyrǵan azamattarǵa úlken alǵysymdy bildiremin»,- dedi jańa páter ıesi Roman Chep. 

Aıta keteıik, búgingi kúni Kókshetaý qalasynda 2 myńnan astam kóp balaly otbasy bolsa, onyń 400 jýyǵy páter kezeginde tur. Sonydqtan, bıylǵy jyly barlyǵy 470 páter kiltin tapsyrý josparlanǵan. Onyń birazy Turǵyn úı qurylys jınaq banki arqyly sheshimin tappaqshy.