"HHI ǵasyr kóshbasshysy" eken desem: Debatqa qatysty halyq ne deıdi?

Saılaýaldy debat aıaqtala salysymen áleýmettik jelilerde qyzý talqyǵa tústi dep jazady Qamshy.kz aqparat agenttigi. 

Halyqtyń basym kópshiligi debat kóńilden shyqpady, qyzý pikirtalas bolǵan joq degen oılaryn bildirip jatyr. Olaı deýge birneshe sebep bar. Birinshiden, saılaýǵa túsken úmitkerler tolyq qatyspady. Ekinshiden, memlekettik til basymdyqta bolǵan joq.

Feısbýk áleýmettik jelisinde Esbolat Aıdabosyn: "Qamshy ustap, shapan kıip kelgen Sádi-Bek Túgelden ózgesi eki tilde sóıledi. Ol kemshilikti Sákeń sóz sońynda aıtyp, alty azamattyń betine basty. Biraq uıalǵan biri joq, qulaqqa da qystyrmaı eki tilde daıyndap kelgen sózin oqyp tura berdi. Uly dala qyranyna daýys bersem be eken?!" , - dep pikir qaldyrǵan. 

Al Serikbol Shaımerden: "Stýdentter sabaqqa barǵysy kelmese, grýppalastaryna jazatyn: "búgin sabaqqa barmaıym, sende barmaı aq qoı" dep, Toqaev ta solaı jasaǵan sııaqty", - dep feısbýk paraqshasyna óz oıyn bildirgen.  

"Kelmegenderdi qoıa turshy, kelip turyp, sovetin saǵynǵan, bir aýyz qazaqsha aıtpaǵan Ahmetbekovterdiń Parlamentte otyrǵanyn-aı... О́zi úmitker taǵy. Táýelsizdik degen ne?" - dep jazdy Jaıngúl Hamıdolla.

Amangeldi Qurmetuly: "Debat boldy ma ne? "HHI ǵasyr kóshbasshysy" baǵdarlamasy eken desem", - dep pikir qaldyrǵan. 

Kezinde prezıdent joldaýyn 90 mınýt tikeleı beretin telearna nege debatqa kelgende 90 sekýndqa tirelip qaldy dep jatqandarda joq emes.

Halyqtyń áleýmettik jelilerde jazǵan ashyq oılaryn oqyp otyrsaq, búgingi teledebatqa halyqtyń kóńili tolmaǵan sııaqty. 

Daıyndaǵan: Marjan Sábet