Bir árip bir ultty ózgertedi. Sonda qazaq...

«...Samaltaý qaıran jerim artta qaldy,

Adasqan órisinen biz bir úıir» .

Osy bir án eske oralǵan saıyn kókiregim ýdaı ashyp, álemtapyraq kúıge túsemin.

Tili ózgergen ulttyń túri de ózgeredi eken. (Biz bul jerde bet pishinimizdi (óńimizdi) ózgertken orystyń 14 árpi haqynda aıtyp otyrmyz). Áripti dybystyń tańbasy nemese notasy desek te bolady. Demek áriptiń ózgerýi áýezdiń (daýystyń) ózgerýine de óz áserin tıgizbeı qoımaıdy. Kúmándanǵan ekensiz kóne grammofonǵa jazylǵan Mustafa men Muhtardyń daýysyn tyńdap kórińiz. Sańqyldap shyqqan sańylaqtar úninen kúdigińiz seıilip, biz ańdatqan oıdyń tóbesinen dál túserińiz anyq. Budan shyǵatyn pátýá baılamy – bir árip bir ulttyń antropologııasyn tolyǵymen ózgeriske ushyrata alady. Muny ǵylymda qatelespesem entelehııa deıdi.

Ras búgingi qazaq – basqa qazaq. Tik ishegi muzdaǵan, beton betti, sup-sur sýyq qazaq. Basqa óriske tap bolǵan tól bolmysyńnyń óz úıirinen adasyp shurqyrasa almaǵan ahýalyna sát saıyn jolyǵasyń. Sosyn dál qazirgi qazaq qoǵamynda QAZAQ bolýdan qıyn eshteńe joq ekendigin túsinesiń.

Hosh delik....

Budan bir ǵasyr bederinde   Ǵumar Qarash balasy :

«...Árbir iste qazaq ısi ańqyǵan,

Tirlikti kózimizben kóremiz be?» - degen saýal joldaǵan edi.

Jasyryp neme kerek, atalǵan asaý suraqqa kúni búginge deıin MEMLEKETTIK MAZMUNDA tolyqqandy jaýap berilgen joq. Bul bilgen adamǵa máńgilik eldiń muratyn eki-aq aýyz óleńge syıdyrǵan qudiretti saýal bolatyn.

Al qarymta jaýap qatýǵa Qazaqııa eli qashan daıar bolady? Til men dildi aıtpaǵanda ishken asymyz ben kıgen kıimimizden KIMDERDIŃ IISI shyǵady ózi?...

Bul ár qazaq balasynyń UIаTY men UJDANYNA túsken uly syn bolýy kerek.

Qazaq topyraǵynda jaratylǵan danyshpandarymyz búginimizben keler ýaqytymyzǵa da óz boljamdaryn jasapty. Aıtqandary kelsin, dýaly aýyzdarymyzdyń deni jaqsylyqqa jorypty. Ras, kóp dúnıeniń quıysqany bosap, kóbesi sógilip keledi.