Bátıma Jákýlına ómirden ozdy

Búgin Shyńjań óńirindegi musylman áıelderi arasynan shyqqan úlken tulǵa Bátıma Qulmuqanqyzy Jákýlına (Jákýlanyń kelini) 84 jasqa qaraǵan shaǵynda dúnıeden ozdy.

Bátıma Jákýlına – 1931 jyly qazirgi Aıakóz mańyndaǵy Úshbıikke qaraıtyn Eńirekeı degen jerde dúnıege kelgen. Aqtaılaq bıdiń besinshi urpaǵy. Ashtyq jyldary sheshesi Bátımany arqalap, elmen birge Sháýeshek qalasyna ótedi. 1930-40 jyldary Sháýeshektegi «Kúlándámııa» mektebinen soń Sháýeshek gımnazııasyn bitirgen. 1946 jyly Ánýar Jákýlınge turmysqa shyǵyp, Shaǵantoǵaı aýdany, Dórbiljin aýdany, Qulja qalasy, Úrimji qalasy sııaqty jerlerde qyzmetter atqarǵan. Kúıeýi Ánýar Jákýlın Ile aımaǵynyń ýálıi, Shyńjań ólkesiniń saıası zań departamentiniń basshysy, QHR halyq quryltaıynyń birinshi shaqyrylym depýtaty bolǵan. Á.Jákýlın qýǵyn-súrginge ushyraǵan jyldarda Bátıma da qýdalaýǵa túskenine qaramastan, áýletiniń ósip-ónýine bar kúsh-jigerin saldy.

Repressııa jyldarynan soń, «Shyńjań áıelderi» jýrnalynyń bas redaktory, Shyńjań áıelderi birlestiginiń tóraıymy orynbasary, Búkilqytaılyq saıası máslıhatynyń depýtaty qyzmetterin atqardy. Shyńjań óńiri Bátıma Qulmuqanqyzyn qurmettep, Bátý apa dep ataǵan.

Bátıma Qulmuqanqyzyn 24 qańtar kúni Úrimji qalasynda jerleıdi.

Bátıma Qulmuqanqyzy – Semeı óńirine aty shyqqan Jákýla bolystyń kelini. 2013 jyly Jákýlanyń týǵanyna 150 jyl tolýyna oraı, ShQO Tarbaǵataı aýdanynda as berildi. Asqa Úrimji qalasynan B.Qulmuqanqyzy arnaıy keldi. Nazarlaryńyzǵa sol kezde daıyndalǵan «Alashtyń alys ketken arystary» atty derekti fılmdi usynamyz.

Marqumnyń týǵan-týystary men qalyń qazaq eline "Qamshy.kz" ujymy kóńil aıtady.