Taısalma, Tamara, qutqar, Qarjaýbaev!!!

Densaýlyq saqtaý jáne áleýmettik damý mınıstrligi “Qazaqstanǵa táýelsizdik alǵan 1991 jyldan beri shetelden 950 myńnan astam etnıkalyq qazaq oraldy” dep habarlapty. Bul kórsetkish olarǵa kóp bolyp kóringenmen, shetelde 5 mıllıon qandasymyz turatynyn eskersek bul málimet kóńil kónshitpeıdi. Biz eger bul qarqynmen júrsek endi júz jylda qandastarymyz Qazaq memleketiniń azamaty bolyp úlgermeıtin sııaqty.

Shettegi qazaqtar turyp jatqan elderde jyldan jylǵa az sandy ulttardyń joıylý qaýpi tónip,  tilinen aıyrylyp jatqan búgingi tańda olardy elge tezirek ákelý - eń birinshi bar qazaqtyń ortaq Otany Qazaqstannyń sharýasy. Eger bul jumys júıeli júrse egemendigimizdiń mańgilik bolýy, mańgilik el strategııamyzdyń júzege asýy tezdeı túser edi. Sondaı-aq,  qazaq ultynyń sandyq jáne sapalyq jaǵynan ósýine de tikeleı áseri bolary sózsiz. Shyndap kelgende, qurylyp jatqan ekonomıkalyq odaǵymyz saıası odaqqa aınalyp ketpes úshin, Soltústik óńirderlerge kórshimiz suqtanbaýy úshin eń aldymen osy eldiń ıesi Qazaq  myqty bolýy kerek.

Alaıda 2013 jyly kóship kelgen qandastarymyzǵa azamattyqty 4 jyldan keıin beretin zań qabyldap, "Qazaq kóshine" uzyn arqan, keń tusaý salynǵan. Keıin 2014 jyly Úkimet qamqóńil qazaqqa úmit ushqynyn syılaǵandaı boldy. Naqtyraq aıtsaq, ótken jyly sáýir aıynyń 22 kúni QR Prezıdenti janyndaǵy OKQ  brıfıngi barysynda Eńbek  jáne  halyqty  áleýmettik qorǵaý mınıstri Tamara Dúısenova “endigi jerde oralman aǵaıyndar bir jyl ishinde Qazaqstan azamattyǵyn alýyna bolady” dep   málimdegen bolatyn. Odan ile-shala 6 mamyrda Dúnıejúzi qazaqtarynyń qaýymdastyǵynda ótken «Kóshi-qonnyń búgingi jaǵdaıy» atty  dóńgelek ústelde Eńbek jáne halyqty áleýmettik qorǵaý mınıstrliginiń Kóshi-qon komıteti tóraǵasynyń orynbasary Asylan Qarjaýbaev Oralmandarǵa bir jyl ishinde azamattyq beretin jańa zań jobasyn daıyndap jatqandaryn aıta kelip kúzde parlamentke usynyp jyl aıaǵyna deıin jańa zań qabyldanatynyn aıtqan. Bul sózderin jaz boıy birneshe ret qaıtalaǵan Qarjaýbaev myrza 28 qazan kúni taǵy QR Prezıdenti janyndaǵy OKQ-niń brıfınginde shetelden kelgen qandastar 6 aı ishinde azamattyq alýǵa bolady dep súıinshi suraǵan. Qarapaıym qazaq - biz de qalyspaı bul kisi aıtqan saıyn saıttarda, áleýmenttik jelilerde qandastardan súıinshimizdi suraı bergenbiz.

Mine, ózderińiz kórip otyrsyzdar. Shetimizden ótirikshi atandyq. Tamara hanym men Qarjaýbaev myrza kimge sengenin bilmeımiz, biz olarǵa senip biraz qazaqty "dúrliktirdik". Endi Otanyna qarap jaýtańdap otyrǵan alystaǵy aǵaıynǵa aıtar ýáj, qaraıtyn bet joq.

Bir adamdy emes, bir qaýym qazaqty aldaý - úırengen úkimtke bolmasa, bizge qıyndaý tıip jatyr.

Taısalma, Tamara, qutqar, Qarjaýbaev!!!

Turdybek Qurmethan