Bıshimbaev soty: Reseılik sarapshylardyń qorytyndysy qylmystyq iske qosylmaıtyn boldy

16 sáýirde ótken sot otyrysynda Bıshimbaevtyń advokaty Qusaıynova Máskeý qalasyndaǵy "N.I.Pırogov atyndaǵy Reseı ulttyq zertteý medısınalyq ýnıversıtetiniń" reseılik sot-medısınalyq sarapshylarynyń qorytyndysyn baıandaǵan edi.

Alaıda jábirlenýshi tarap pen memlekettik aıyptaýshy bul saraptamanyń jalǵan qujat ekenin jáne túrli zańbuzýshylyqtarmen rásimdelgenin málimdedi. Dálirek aıtqanda, ol mamannyń ózi Aqtóbede, al Ramazanova Astanada bolǵan.

Sonymen qatar memlekettik aıyptaýshy Aıjan Aımaǵanova sarapshylar máıitti kórmeı qashyqtan saraptama jasaı almaıtynyn, tek Tahır Halımnazarov sııaqty qosymsha tolyqtyrý engize alatynyn málimdedi.

“Saraptama sarapshylardyń quziretinen tys jasalǵan. Sarapshy gıstologııa jáne neırohırýrgııa mamany bolmasa da, sol salaǵa qatysty qorytyndy shyǵarǵan. Bul saraptama qorytyndysyn zańsyz dep tanımyz”, – dedi sýdıa Aıjan Kólbaeva.

Sýdıa prokýror men jábirlenýshi taraptyń ótinishin qanaǵattandyryp, reseılik mamannyń qorytyndysyn iske qospaý týraly sheshim shyǵardy. 

Buǵan deıin Bıshimbaevtyń advokaty jalǵan qujat jasady degen kúdikke ilingenin habarlaǵan edik. Reseılik sarapshylar Saltanat Núkenovanyń ólimin "eski jaraqaty saldarynan kóz jumdy" dep qorytyndylaǵan.

Burynǵy ulttyq ekonomıka mınıstri Qýandyq Bıshimbaev áıeli Saltanat Núkenovany óltirdi degen kúdikpen ustalǵan. Keıinnen qylmysty jasyrdy degen aıyppen Saltanat Núkenova kóz jumǵan meıramhananyń dırektory da tutqyndaldy.

Sondaı-aq eks-mınıstr Qýandyq Bıshimbaevqa Qylmystyq kodekstiń 110-baby 2-bóligi ("Azaptaý"), Qylmystyq kodekstiń 99-baby 2-bóligi 5-tarmaǵy ("Asa qatygezdikpen adam óltirý") boıynsha jańa aıyptar taǵylǵan edi. Al onyń týysy Baqytjan Baıjanov qylmysty jasyrǵany jáne habarlamaǵany úshin aıyptalǵan.