Reseıde soǵysqa túrmede otyrǵan áıelder shaqyrylýda – reseılik BAQ

Reseı Qorǵanys mınıstrligi Ýkraınaǵa qarsy soǵys júrgizý úshin qosymsha adam resýrstaryn izdep, Reseı kolonııalaryndaǵy áıelderdi belsendi túrde tartýda. Bul týraly Ýkraınanyń Ulttyq qarsylasý ortalyǵyna silteme jasap dw.com saıty habarlady.

"Birinshi kezekte tutqyn áıelder arasynan dárigerler, mergender irikteledi. Sondaı-aq áıelder qalasa, shabýyldaýshy jasaqtarǵa da alynady. Túrmedegi áıelderge aqsha jáne úılerine qaıtý múmkindigi ýáde etilgen jáne olardyń kópshiligi tiri oralatynyna senip, usynylǵan sharttarmen kelisip jatyr", – delingen UQK habarlamasynda.

Buǵan deıin reseılik quqyq qorǵaýshylar men BAQ áıelderdi Ýkraınaǵa qarsy soǵysqa tartý týraly habarlaǵan bolatyn. Máselen «Rýs sıdıashaıa» quqyq qorǵaý jobasynyń negizin qalaýshy Olga Romanova Reseı Qorǵanys mınıstrliginiń úgitshileri tutqyn áıelderdi Ýkraınadaǵy soǵysqa jiberý úshin jaldap jatqanyn birneshe ret atap ótti.

Jalpy osyndaı alǵashqy habarlamalar 2023 jyldyń kókteminde paıda bolǵan. Biraq ol kezde Romanova men Ýkraına Qarýly Kúshteriniń Bas shtabynyń málimeti boıynsha, jaldaý Ýkraınanyń okkýpasııalanǵan aýmaqtaryndaǵy kolonııalarda júrgen.

Artynsha Olga Romanova áıelderdi soǵysqa jappaı tartý Reseı aýmaǵynda júzege asyryla bastaǵanyn da aıtqan bolatyn. 

Aıta ketsek, Ýkraına da sarbaz jetispeýine baılanysty áskerge áıelderdi de jappaı shaqyrý jumystary júrgizilýde.