Jemqor mektep basshylyqtaryna tyqyr taıandy. Antıkor kúrestiń tıimdi tásilin tapty

«Bıýdjet qarajatyn josparlaý jáne ıgerý prosesterindegi jemqorlyq táýekelderin boldyrmaý úshin Pavlodar, Aqmola jáne Túrkistan oblystarynda bilim berý salasynyń bıýdjetin sıfrlandyrý boıynsha pılottyq joba iske qosyldy. Ol bilim berý salasynda mıllıardtaǵan teńgeni jymqyrý sebepterin joıý maqsatynda bıýdjettik ótinimderdi qalyptastyrý jáne usyný prosesin avtomattandyrýdy kózdeıdi. Aqparattyq júıeni testileý nátıjesi oń bolǵan jaǵdaıda, joba búkil el boıynsha iske qosylatyn bolady», delingen habarlamada.

Sybaılas jemqorlyqqa qarsy qyzmettiń keltirgen deregine sáıkes, 2023 jyldyń basynan beri bilim berý salasynda 192 qylmystyq is tirkelgen. Bıýdjetke keltirilgen zalal kólemi 13 mlrd teńgeden asty.

Eń iri jymqyrý Túrkistan, Jetisý, Almaty, Qyzylorda, Aqtóbe oblystary men Almaty qalasynda anyqtaldy.

Sybaılas jemqorlyqqa qarsy qyzmet bilim berý salasyndaǵy jemqorlyq táýekelderine syrtqy taldaý júrgizý barysynda eńbekaqy tóleý qorynan qarajat jymqyrýmen baılanysty turaqty qylmystyq shemalardy ashty:

1) qyzmetkerlerge jalaqy onyń laýazymynan qaraǵanda áldeqaıda kóp aýdarylǵan;

2) jalaqy bilim berý mekemelerinde resmı túrde tirkelmegen adamdarǵa berilgen;

3) qyzmetkerdiń kart-shottaryna jalaqy eseptelip, al tólem qujattarynda basqa tulǵanyń derekteri kórsetilgen;

4) bir adamǵa aqsha aýdarymdaryn birneshe ret qaıtalaǵan;

5) «óli jandarǵa» - týystary men jaqyndaryna aqsha aýdarǵan.

«Býhgalterler mekteptiń býhgalterlik esep júıeleri, ulttyq bilim berý bazasy jáne «Qazynashylyq-klıent» júıesi arasyndaǵy ıntegrasııanyń joqtyǵyn paıdalanǵan. Olar tólem qujattaryna qolmen túzetýler engizip, bıýdjet aqshasyn jymqyrǵan», delinedi quzyrly vedomstvo esebinde.

Máselen, jýyrda, 7 aqpanda Jańaqorǵan aýdandyq soty «Jańaqorǵan aýdanynyń bilim bólimi» MM basshysy B. Ibragımovqa, bas býhgalteri K. Aıazbaevaǵa jáne 24 mekteptiń býhgalterlerine qatysty úkim shyǵardy. Olar jalpy somasy 1 mlrd teńgeden asa iri mólsherde bıýdjet qarajatyn jymqyrǵany úshin kináli dep tanyldy.

Sot úkimimen mekemeniń basshysyna jáne bas býhgalterine 8 jyl bas bostandyǵynan aıyrý, mektep býhgalterleriniń birine – asyraýynda jas balasynyń bolýyna baılanysty 5 jyl merzimge jazasyn keıinge qaldyra otyryp, 7 jyl bas bostandyǵynan aıyrý jazasy taǵaıyndaldy.

Sonymen qatar sottalǵandar memlekettik qyzmette jáne ózge de uıymdarda qyzmet atqarý quqyǵynan ómir boıy aıyryldy

Sol sekildi Túrkistan oblysynyń eki aýdanynda ǵana Shardara jáne Saryaǵash bilim bólimderiniń qyzmetkerleri úsh jyl ishinde 3,7 mlrd teńge jymqyrǵan. Qazirgi ýaqytta tergeý júrip jatyr.

Jetisý oblysynda Taldyqorǵan qalasynyń bilim bóliminiń bas býhgalteri bastaǵan uıymdasqan qylmystyq topqa qatysty tergeý aıaqtaldy.

Qarajat bilim berý salasynyń qyzmetkerleri bolyp tabylmaıtyn tulǵalardyń shottaryna aqsha aýdarý arqyly jymqyrylǵan.

Sonymen qatar, quramynda 3 bilim bóliminiń qyzmetkeri men 10 mektep býhgalteri bar qylmystyq toptyń músheleri ózderine jáne basqa mektep qyzmetkerlerine belgilengen jalaqydan joǵary jalaqy tólegen. Olarǵa jalpy somasy 4,2 mlrd teńgeden astam shyǵyn keltirilgen. Zalaldy óteý maqsatynda jalpy somasy 3 mlrd teńgege qatysýshylardyń múlki tárkilendi.

Qylmystyq is qabyldanǵan sheshimniń zańdylyǵyn tekserý jáne sotta aıyptaýdy odan ári qoldaý úshin qadaǵalaý organyna berildi.