Qazaqstan men Qytaı arasynda áýe reısteri kóbeıedi

China Southern Airlines áýekompanııasy 2024 jylǵy 23 qańtardan bastap aptasyna 3 reıs jıiligimen Almaty – Beıjiń baǵyty boıynsha reıster ashýdy josparlap otyr. Bul týraly Azamattyq avıasııa komıteti tóraǵasynyń mindetin atqarýshy Tımýr Tlegenov habarlady.

Sonymen qatar suranys artqan kezde China Southern Airlines áýekompanııasy Almaty qalasynan Úrimshi jáne Sıan qalalaryna, sondaı-aq Astana qalasynan Úrimshi qalasyna 2024 jyldyń kóktemgi-jazǵy maýsymynan bastap qoldanystaǵy baǵyttar boıynsha reıster sanyn ulǵaıtý múmkindigin qarastyrýǵa daıyn. 

Loong Airlines áýekompanııasy bıyl jeltoqsan aıynda Almaty – Hanchjoý baǵyty boıynsha oryndalatyn reıster sanyn aptasyna 3 reısten 4 reıske deıin arttyrýdy josparlap otyr.

Kelesi jyly jolaýshylar aǵyny artqan jaǵdaıda áýe kompanııasy reıster sanyn aptasyna 7-ge deıin arttyrýdy kózdep otyr. Sondaı-aq áýekompanııa 2024 jyly Astana – Hanchjoý, Astana – Chendý jáne Almaty-Chendý áýe baǵyttary boıynsha reısterdi ashý máselesin pysyqtap jatyr. Air China áýekompanııasy da Astana – Sıan – Pekın baǵyty boıynsha oryndalatyn reıster sanyn aptasyna 2-den 3-ke deıin ulǵaıtý máselesin qarastyryp jatqanyn habarlady.

Bul rette áýekompanııa Sıan qalasyna qonbaı, eki astana arasynda aptasyna úshinshi reısti tikeleı oryndaý máselesin de qarastyratyn bolady. Jalpy 2024 jylǵy kóktem-jaz navıgasııa kezeńinde eki el arasyndaǵy reıster sany qoldanystaǵy jáne jańa áýe baǵyttary boıynsha aptasyna 30 reıske deıin artady dep kútilýde.