Kásibim – násibim. Konder jóndep úsh úı alǵan

Birjan Dáýletqazy 15 jylǵa jýyq ýaqyttan beri Almatydaǵy Baqorda bazarynyń mańynda kólik radıatoryn, kondısıonerin, peshin jóndeýmen aınalysady. O basta bul salaǵa kelem degen oı úsh uıyqtasa da túsine kirmegen. Oqý oqımyn, bilim qýam, qyzmet isteımin, Amerıkaǵa barsam dep armandaıtyn. Alaıda ómir joly ózgeshe órbidi. Áıtkenmen oǵan esh ókinbeıdi, al Amerıka týraly umytqan emes. Túbinde bir baryp qaıtatynyna senimdi. 

Keıipkerimiz Qytaıdyń Ile-Qazaq avtonomııalyq oblysyna qarasty Kúnes aýdany Zekti qalashyǵynyń týmasy. Er jete bastaǵannan Qazaqstanǵa kelýdi oıǵa alǵan. Úıge salmaq salmas úshin eńbekke jastaı aralasyp, oqýshy kezinen eresektermen qatar qant zaýytynda, kirpish shyǵarytyn jerde isteıdi. 2005 jyly mektepti támámdap, jıǵan-tergenimen Qazaqstanǵa keledi. Joǵary oqý ornynda oqý nıetimen qandastarǵa arnalǵan baǵdarlama aıasynda bir jyl Shymkentte daıarlyq kýrsynan ótip, 2006 jyly Almatydaǵy agrarlyq ýnıversıtettiń agro-hımııa mamandyǵyna grantqa túsedi. Amerıkany kórý týraly alǵashqy oılar osy shaqta paıda bolǵan. AQSh-ta oqyp jatqan dosynyń aıtqandaryna qyzyǵyp, fılmderdegi amerıkalyqtardyń ómir salty, “amerıkalyq arman” týraly áńgimeler qushtarlyǵyn arttyra tústi. Osy oıdyń jetegimen 2 kýrsta syrttaı bólimge aýysyp, aǵylshyn tilin oqıdy. Kýrs aqshasyn tóleý úshin saýda ortalyqtarynda, meıramhanalarda daıashy bolyp jumys isteıdi. Arasynda shet tilin bir jyl Úrimshige baryp oqyp, kelisimen Qazaqstan azamattyǵyn alady. Biraq Amerıkaǵa birden kete qoıý qaıda… Janbaǵys, kúnkóris dep oılamaǵan jerden kólik radıatoryn jóndeýmen shuǵyldanatyn aǵasynyń janynan bir-aq shyǵady. Úsh aıda neniń ne ekenin túsinip, bir jylda sharýanyń syryn bir kisideı uǵyp alady. Sodan beri bul kásip turaqty jumysyna aınaldy.

Bıylǵy aptap ystyqta kólik sheberiniń aldynan adam úzilmedi. Uıqyny umytyp 14-15 saǵatqa deıin jumys istegen kezder kóp. Mundaı nópir kúnde buıyra bermeıtindikten, jumystan esh qashpaıdy.

Sol bir tynymsyz kúnderdiń óteýi ispetti tamyzdyń orta sheginen beri jumys saıabyrsyǵan. Bul – ádettegi jaıt. Osy salanyń ózindik ereksheligi. Birer aı osylaı bolyp, peshin jóndetýshiler qazannyń ortasynan jańa jylǵa deıin jumysty qaıta qyzdyrady da qańtardan sáýirge deıin jumys bir qalypta júredi.

Jumys birde qaýyrt, birde baıaý bolǵanymen tabyssyz qalǵan kezi joq. О́z úıi men úlken úıdi teńdeı qamtamasyz etip otyr. Úlkenderdi Zektiden kóshirip alǵan. Olardy osynda jaıǵastyrýda da negizgi júkti ózi kótergen. Ara-tura shetel aralap turady. El ishi men Qytaıdy aıtpaǵanda Qyrǵyzstan, О́zbekstan, Mońǵolııa, Grýzııany kórgen. Endigide Bakýge barýdy oılaıdy.

О́zi “shetelde demalý úshin asqan baı bolý shart emes, tek qolda bardy uqsata bilý jetkilikti” deıdi. Bıyl Eýropanyń 5 eline saıahattamaq bolǵan. Alaıda alǵan qos birdeı úıine jóndeý júrgizip, josparyn keıinge shegergen. Aıtqandaı keıipkerimizdiń Almatyda úsh páteri bar. Keıingi ekeýine úıdiń irgetasy qalana bastaǵannan qarjy quıyp, naryqtyq qunnan tómen baǵaǵa alǵan. Bári ul-qyzynyń bolashaǵy men jaıly qarttyqtyń qamy. Aldaǵy jyldary pasporttaǵy elderdiń sanyn arttyryp, AQSh-qa vızaǵa tapsyryp kórmek. Sóıtip, Amerıkany kórem degen balalyq armanyn oryndaýdy oılaıdy.

Birjan Dáýletqazy qoǵamdyq ómirden de tysqary emes. Eldegi saıası oqıǵalarǵa beıjaı qaramaıdy. Qamshy portalynyń astarly ázilge negizdelip, saıası satıraǵa qurylǵan Qamshylike jobasyn jasaýǵa belsene aralasyp, kóptegen beınerolıkterde akterlik qyryn synap kórgen.

 

 

 

Posmotret etý pýblıkasııý v Instagram

 

 

 

Pýblıkasııa ot Bilal Quanysh (@bilal_quanysh)

Sheberdi izdep kelýshilerdiń deni turaqty klıentter, jańa adamdardyń ózi negizinen tanysynyń keńesimen kelip jatady.

Salada júrgen 15 jylda 20 shaqty bala tárbıelep shyǵarǵan. Búginde olardyń 10-nan astamy kásibin dóńgeletip otyr. Keıipkerimizdiń keleshekte iske asyrsam degen oılary barshylyq. Ol jaıly jar salǵandy emes, ýaqyt enshisine qaldyryp, “aryq aıtyp, semiz shyqqandy” qup kóredi. Oǵan deıin násibin osy kásipten terip júre bermek.