24 Sáýir, 2024 Álem
Kórneki sýret
Latvııa úkimeti mektepterde orys tilin ekinshi shet tili retinde oqytýdan birtindep bas tartý týraly sheshim qabyldady. 2026/27 oqý jylynan bastap oqýshylar orys tilin oqymaıdy. Bul jóninde Latvııa mınıstrler kabınetiniń saıtynda jazylǵan dep jazdy Azattyq radıosy.
Bastaýyshty bitirgen oqýshylar orys tiliniń ornyna Eýroodaq nemese Eýropa ekonomıkalyq aımaǵyna kiretin elderdiń tilin ekinshi shet tili retinde tańdaı alady.
Orys tilin ekinshi shet tili retinde tańdaǵan oqýshylar oqýyn jalǵastyra beredi. Latvııa mektepterinde birinshi shet tili retinde aǵylshyn oqytylady.
Latvııa úkimeti mundaı bastama jastardy Eýropanyń bilim keńistigine kiriktirýine yqpal etedi dep sanaıdy.
"Mektepte Eýroodaq tilderiniń birin ekinshi shet tili retinde tańdaý arqyly biz Eýropanyń mádenı keńistigine jáne demokratııalyq álem qundylyqtaryna jatatyndyǵymyzdy rastaımyz. Osy ǵasyrda Reseı bastaǵan qandy soǵys jáne ýkraın halqynyń genosıdinen keıin orys tili Latvııa qoǵamynyń edáýir bóligi úshin mindetti ekinshi shet tili retinde qala almaıdy" dedi Latvııanyń bilim jáne ǵylym mınıstri Anda Chaksha.
Statıstıka málimetine súıensek, 2022 jyly Latvııada ekinshi shet tili retinde orys tilin – 91,1 myń, nemis tilin – 27,6 myń, fransýz tilin shamamen 4 myń oqýshy oqyǵan. Bılik elde orys tilin úırengisi keletin azamattardyń kóp bolýyn ózge shet tili oqytýshylarynyń azdyǵymen túsindirgen.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir