Shymkenttegi atysqa baılanysty tyń derekter paıda boldy

Polıseıler Shymkenttegi  atysty kim shyǵarǵanyn anyqtady – dep Qamshy.kz aqparat agenttigi habarlaıdy, "KTK" telearnasyna silteme jasap.

Shymkenttegi «Súndet» kafesinde bolǵan atys saldarynan bir adam kóz jumyp, bes adam zardap shekti. Al tórteýi áli aýrýhanada jatyr. Polısııa qarýly shabýyl uıymdastyrǵan eki adamnyń kim ekenin anyqtady. Alaıda, olar áli ustalǵan joq.

Shymkent qalasy polısııa departamentiniń basshysy Eraly Jumahanbetovtyń aıtýynsha, atys uıymdastyrǵandardyń arasynda buǵan deıin sottalǵandar da bar,

"Kúdiktiler bar, kimniń oq atqany anyqtaldy. Qazir buǵan ne sebep bolǵany tekserilip jatyr. Arasynda buǵan deıin sottalǵandar da bar. Bul nebári bir táýliktiń ishinde júrgizilgen jumys nátıjesi. Qarý tárkilendi ", – dedi ol.

Qylmystyq iske qatysty polıseıler qylmysqa kólikte tabylǵan qomaqty aqshanyń qandaı qatysy bar ekenin de anyqtap jatyr.

Sondaı-aq  teńge jáne dollarmen saqtalǵan qarajat kafe mańynda turǵan kólikterdiń birinen tabylǵan bolatyn.

Qazirgi tańda zardap shekken eki adam áli jansaqtaý bóliminde jatyr. Al ekeýine de oq tıgen.

"Tórt er adam aýrýhanaǵa jetkizildi. Bárine oq tıgen, jaǵdaıy aýyr. Eki adamǵa ota jasaldy. Al ekeýi hırýrgııa jáne travmatologııa bólimine aýystyryldy. Besinshi adam dárigerler teksergen soń birden úıine jiberildi", – dedi №1 Shymkent aýrýhanasynyń bólim basshysy О́tkirjan Moldahanov.

Polısııa zardap shekkender men oq atqan adamdardyń bir-birimen tanystyǵyn anyqtaýda. Odan ózge tergeýshiler qarýdy saraptamaǵa jiberdi. Qaskóıler ony oqıǵa ornynan 300 metr jerde laqtyryp ketken.

Qylsystyq is adam óltirý jáne zańsyz qarý saqtaý baptary boıynsha tergelip jatyr.