«Adidas» krossovkıin kıgen 1100 jastaǵy mýmııanyń qupııasy ashyldy

«Adidas» tanymal brendindegi úsh aq jolaq ekinshi dúnıejúzilik soǵystan keıin paıda bolǵan kórinedi. Sol kezde aıaq kıimderge teriden jolaqtar qaldyrý buıymnyń sapaly ekeniniń kórsetkishi bolǵan. Osy oraıda, Adolf Dassler(«Adidas» negizin qalaýshy) óz taýarynyń ózgelerden alystan aıqyndap turatyn belgisi bolǵanyn qalady. Osylaısha, óz taýarlaryndaǵy teri jolaqtardy aqqa boıap tastaıdy. «Adidas»-taǵy úsh aq jolaqtyń paıda bolý tarıhy osyndaı.

Alaıda, bul ıdeıa b.z. H ǵasyrynda-aq ózge bireýdiń oılap taýyp qoıǵan ıdeıasy bolyp shyqty. Oǵan dálel, byltyr Mońǵolııa jerinen tabylǵan áıel mýmııasy dep habarlaıdy Qamshy aqparattyq agenttigi.

Arheologtardy mýmııanyń myń jarym jyldaı buzylmaı saqtalýy ǵana emes,  aıaǵyndaǵy úsh jolaqty brend aıaq kıimi tańǵaldyrǵan. Joramaldar kóp boldy, ǵajap qubylystarǵa senetinder áıeldiń zaman arasynda erkin aýysyp júre alatyn qasıeti bar bolýy kerek degen pikirlerdi de aıtty. Alaıda, bir jylǵa jýyq júrgizilgen zertteýler nátıjesinde, ǵalymdar birqatar qorytyndyǵa keldi: «Áıeldiń jasy shamamen 30-40 jasta. Bas súıeginen jaraqattar tabylýyna baılanysty, basynan soqqy alyp qaıtys bolǵanyn ańǵarýǵa bolady. Alaıda, bul oqys bolǵan oqıǵa ma, álde shynymen ózgeler tarapynan soqqy alǵan ba ony anyqtaı almaımyz», - deıdi Mońǵolııa Mádenı Muralar Ortalyǵynyń dırektory Galbadrah Enhbat. Arheologtardyń zertteýinshe, áıel joǵary statýstaǵy hanshaıym nemese patshaıym emes. О́ıtkeni, kóne zamanda laýazymdy adamdardy altyn-kúmisterimen birge kómgen. Al tabylǵan mýmııa-áıel qarapaıym tiginshi bolǵan. Bul joramalǵa negiz bolatyny - birge kómilgen zattary tigý quraldary ekeni. Sonymen qatar, sapaly ári sándi kıim qaldyqtary. Aıaq kıimniń saqtalýy da sol kezdegi sapanyń myqty bolǵanyn dáleldep otyr. Aıaq kıim tizege deıin keledi, muqııat sándelgen, sapaly, berik teriden tigilgen eken.

«Adidas» krossovkıin kıgen mýmııa qazirgi tańda Mońǵolııa Ulttyq Murajaıyna tapsyrylǵan.