«ALTY ALAShTYŃ OQÝ ORDASY»: Almatyda Qazbilim ulttyq lıseıi ashyldy

Búgin Almaty qalasynda Qazbilim ulttyq lıseıi ashyldy. Lıseıdiń ashylý saltanatyna 500-den astam adam qatysyp, oqýshylar men muǵalimder óner kórsetti. Qazirgi tańda elimizdiń 7 óńirinde Qazbilim ulttyq lıseıi jumys istep, jaratylystaný baǵyty boıynsha qazaq tilinde bilim berip keledi. Bir ereksheligi lıseıde domyra shertip, terme aıtýdy, shahmat oınaýdy úıretetin qosymsha úıirmeler de bar.

Jıynnyń shymyldyǵy Ánuranmen túrilip, mektep oqýshylary men muǵalimderinen quralǵan top «Balbyraýyn» kúıin tartty. Ashylý saltanaty kezinde alǵashqylardyń biri bolyp Aıatjan Ahmetjanuly sóz alyp, ata-analarǵa alǵysyn bildirdi.

«Biz uly armanǵa qanat qaqqan baspaldaqtyń alǵashqy satysynda turmyz. Qazaq degen halyqtyń balasyna bilim nuryn shashý úshin jaýapkershiligi aýyr júkti arqalaǵaly turmyz. Biz ulttyq mekteptiń keregesin keńeıtip, sapasyn arttyrǵymyz keledi. Sebebi keshegi Maǵjan aıtady: «Eger mektepterimiz qazaqtyń janyna jaqyn bolsa biz bolashaq úshin aıanbaı serttese alamyz».

Basty armanymyz – qazaqtyń janyna jaqyn mektepti qurý. Mustafa Shoqaı «Bala qaı tilde bilim alsa túbi sol ultqa qyzmet etedi», dese, Júsipbek «Orys tárbıesin alǵan bala ultqa qyzmet qylyp jarytpaıdy», degen sóz qaldyrǵan. Biz ultqa qyzmet qylatyn, qazaqty armanyna jetkizetin, qazaq armanyn oryndaıtyn mekteptiń negizin qalaǵymyz keledi. Sol qalaýdyń búgin alǵashqy satysynda tursyzdar. Sizderdiń qoldap, qýattap kelgenderińizge, balalaryńyzdyń bilim alýy úshin bizdi tańdaǵandaryńyz úshin shyn júrekten basymdy ıip alǵys aıtamyn», – dedi Aıatjan Ahmetjanuly.

Ulttyq lıseıdiń ashylýymen quttyqtap izgi tilegin bildirgenderdiń qatarynda Qamshy.kz portalynyń basshysy Bilál Qýanysh, “Egemen Qazaqstan” basylymynyń redaktory Qalmaǵanbet Muhammetqalı boldy.

«Sonaý Álıhan Bókeıhandardyń zamanynda «Zaman – oqyǵandiki» degen uran bolǵan. Keıin 20 ǵasyrdyń ortasynda «Zaman – jaqsy oqyǵandiki» degen uran paıda boldy. Al qazir damyǵan, tehnologııalar zamany ǵoı. Sol sebepti búgingi kúni «zaman – dástúrge laıyq ulttyq bilim alǵandiki», degen uranǵa aınalyp bara jatyr. Sebebi jahandaǵan álemde adamdy, ultty ereksheleıtin bir-aq nárse bar: óziniń tól mádenıeti, tili, dástúri. Qazir bir erekshelensek osymen ǵana erekshelene alamyz. Bilim salasynda ulttyq negizge qadam basýymyz – jaqsy úrdis.Osydan 6 jyl buryn Kazbilim atty bilim berý ortalyǵynyń ashylý saltanatynda sóz sóılep, tilek aıtqan edik. Endi sol kishkene oqý ortalyǵy úlken lıseıge aınalyp otyr. Shyn júrekten qutty bolsyn!», dedi «Egemen Qazaqstan» gazetiniń redaktory Qalmaǵanbet Muhametqalı.

“Qamshy” portalynyń jetekshisi Bilál Qýanysh:

– Ádette ulttyq mektep dese jurt aqyndar men ánshi, óleńshilerdi daıyndaıdy dep oılaıdy. Alaıda Aıatjan ashqan mektep jaratylystaný baǵytyndaǵy ǵylymdardy jańa zamanǵa laıyqtap, beıimdep, qazaqtyń bir kem-ketigin túzeıtin mamandardy daıyndaıtyn ulttyq mektep dep oılaımyn. Aıatjan mektebine alty Alashtyń balasyn jıyp jatyr. Bolashaqta “Aıatjannyń shákirtimiz” dep maqtanatyn urpaq kóp bolsyn bolsyn, - dep tilegin aıtty.

Aıatjan Ahmetjanuly jıyn barysynda óziniń komandasymen, ıaǵnı, mektep muǵalimderin tanystyrdy. Muǵalimderdiń kóbi –jastar. Lıseıdiń negizin qalaýshy Aıatjan Ahmetjanuly “Jastarda energııa kóp. Olardy tárbıeleýden qoryqpaımyz”,- dedi.

Jıynda án aıtqan Ushqyn Jamalbek Almaty qalasy maslıhatynyń depýtaty Ákim Tursunmen birge lenta qııý rásimine qatysty. Ashylý saltanatynan keıin ata-analar synyptardy aralap, muǵalimdermen tanysty.