Fazylbek Ábsattaruly. Myna júıe tórimdi kórime aınaldyrýy múmkin...

Qadirli jýrnalıster!

Jalpy ádiletsizdiktiń aýyly jaratylysymnan alys, janymnyń qas ekeni meni tanıtyndar úshin belgili jaǵdaı. Al qoǵamdaǵy qandaı da bir shekten shyqqan ádiletsizdikterge qarsy kúreste jeńip shyǵýymyz úshin bárimizge naqty dálelder men qujattar kerek ekeni daýsyz. Osy kúnge deıin túrli ádiletsizdikterge qarsy bel sheship kirise almaǵan sebebim, kómekteskim kelgen azamattardyń ne qujaty túgel emes ne áıteýir isinde bir kemshiligi bolyp jatatyn. Bul joly ádiletsizdik basymnan ótip jatqany úshin tııanaqty túrde qujattarymdy rettep, shekten asyra shyǵyp ketken ádiletsizdikke qarsy 3 jyl daıyndyqpen kúresip kelemin. Qysqasha aıtqanda, Astanadan 1 bólmeli páter satyp alamyn da, ony Astana qalalyq ákimshiligi tartyp alyp jatyr. Kezdesken jýrnalısterdiń bárine birden áńgimeniń basynda «Bul máselege qoǵamdaǵy shekten shyqqan ádiletsizdiktiń kórinisi retinde qarasańyzdar atsalýǵa, al eger buǵan meniń jeke máselem dep qarasańyzdar aralaspaýlaryńyzdy suraımyn» dep ashyp, nyqtap aıtyp aldym. Sebebi, aldyma qoıǵan maqsatym osy tórt qubylam túgel qujattarymmen, memlekettik organdardyń shekten shyqqan ádiletsizdikterine, jalpy aıtqanda qoǵamdaǵy kóp máselelerdiń tyǵyryqqa tirelgendigin ashyp kórsetý. Jalpy bul kúreske bel sheship kúreske shyǵýǵa qanymdy qyzdyryp, namysymdy qamshylaǵan jaǵdaı: kóbine kóp ózge ulttardyń Qazaqstan jerinde qazaqtardy ezip-janshyp, qorlyq kórsetip jatqany sebep boldy. Jáne bul jaǵdaıǵa birde-bir qazaqtyń bas kóterýge shamasy jetpeı beıshara kúıin kórgenim shydamymdy tipti taýysyp ketti.

Qazaqstannyń qaı jerinde bolsaq ta ádiletsizdikke ushyrap jatqan, qorlyq kórip jatqan, beıshara kúı keship jatqan qazaq ulty ekenin endigi jasyra berýdiń qajeti joq. Elimizdegi eń aýyr, las jumystardy qazaqtar atqarady, bazarda arba súırep júrgen tek qana qazaqtar, qalada jataqhana, saıajaı jaldap, ózge ulttyń páterin jaǵalap jan saýǵalap beıshara kúıde júrgen negizinen qazaqtar.

Osyǵan uqsas mysaldardy Qazaqstanda 100 myńdap emes mıllıondap keltirýge bolady. Qysqasy qazaqtar óz elinde ógeı halge jetkenin, barlyq salany ózge ulttardyń baqylaýǵa alyp jatqany bultartpas dálel bola alady.

Alystan mysal izdemeı-aq 3 jyldan beri basymnan ótip jatqan jaǵdaı da birshama jaıtqa kóz jetkizedi.

Barlyǵy túsinikti bolýy úshin jaǵdaıdy qysqasha baıandar bolsam: «Korporasııa Astana-Stroıınvest» JShS (prezıdenti A.N. Lıan) jáne «WS-T» JShS-nan (Sergeı Akbıev) 07.09.2009 kúni № 8/07 kelisim sharty boıynsha 1 bólmeli páter satyp alǵan edim. Alaıda atalǵan korporasııa 1,5 aıdan keıin, ıaǵnı 11.17.2009 kúni Astana qalasynyń Qurylys basqarmasyna (bastyǵy V.Lıýtov) satyp jiberipti. Osydan keıin kóp ýaqyt ótpeı atalǵan korporasııa menimen jasasqan kelisim shartty buzý úshin 2010 jyldyń tamyz aıynda sotqa júgindi. Keltirgen dáıekteri kúlkili hám syltaý ekeni taıǵa basqan tańbadaı edi. Nátıjesinde Astana qalalyq sotynyń barlyq ınstansııalary: Apellıasııalyq ınstansııasy sotynyń qaýlysy men Astana qalalyq soty Kassasııalyq sot alqasynyń qaýlysymen kelisim shartym tolyǵymen kúshinde qaldyryldy. Al Astana qalasy Qurylys basqarmasynyń 02.08.2011 №3452 hatynda ózderi kórsetkendeı «2009 jyly 17 qarashada jasalǵan № 9/6-NS shartyna sáıkes mansardtaǵy páterlerdiń bir bóligin satyp aldy» dep jazady. Osy shartqa súıene otyryp meniń páterimdi satyp alǵandaryn aıtady. Birinshiden, olar 2009 jyldyń 17 qarashasynda satyp alǵan bolsa men ony olardan buryn 2009 jyly 7 qyrkúıekte satyp alǵanmyn. Jáne meniń kelisim-shartym sottyń qaýlysymen tolyqtaı kúshinde. Endi oılap kórińizshi sottyń sheshimimen tolyqtaı kúshinde turǵan kelisim shart zańdy ma, álde satyp alý merzimi keıinnen jáne sot sheshimimen kúshinde joq kelisim shart kúshinde me? Iаǵnı bir páterdi eki ret satyp otyrǵan «Korporasııa Astana-Stroıınvest» JShS-niń jáne Astana qalasynyń Qurylys basqarmasy atalǵan páterdiń satylǵanynan habardar bola otyryp, memlekettik bıýdjettiń qarajatyn talan-tarajǵa salyp, kommersııalyq uıymnyń múddesi úshin jasaǵan áreketterin qalaı túsinýge bolady?

Nátıjesinde Qurylys basqarmasy bul máseleni sot arqyly sheshýimdi surap hat jazǵan bolatyn. Sottyń sońǵy sheshimi 01.11.2011 kúni meniń zańdy quqymdy qorǵap sheshim shyǵardy. Alaıda Qurylys basqarmasy bul sottyń sheshimine de qaramastan, ıaǵnı barlyq jaǵdaıdan habardar bola otyryp, 16.03.2013 kúni alys-beris aktisi arqyly «Qalalyq jyljymaıtyn múlik» RMK-ne berip jibergen. Al «Qalalyq jyljymaıtyn múlik» RMK osynyń negizinde ádilet organdaryna tirketip, páterimdi basqa bireýge jalǵa berip jibergen. Atalǵan memlekettik organdardyń Sot sheshimderin oryndamaǵany bylaı tursyn, endi olar meni úıden kúshtep shyǵarý týraly habarlama joldap úlgerdi.

Endi sotqa júginip jatqanymmen senimniń az ekenin jasyrmaı aıtyp ótkim keledi. Sebebi 2011 jylǵy 5 tamyzda Astana qalasy Almaty aýdandyq soty sýdıa A.Asanova páterde, tólegen qarjyda joq sekildi sheshim shyǵarǵan-tyn. Osylaısha sottyń ádiletsiz sheshim shyǵara alatynyna kýá bolǵanmyn. Biraq artynsha bul sheshimniń ádiletsiz ekendigin qalǵan ınstansııalarda dáleldep sheshimdi ózgertken edim. Endigi budan da qıyn bolyp turǵany «memlekettiń múddesin qorǵaý maqsatynda» dep sotta memlekettik organdardyń jeńip shyǵý múmkindigi mol ekenin, ıaǵnı ashyq túrde páterimdi tartyp alý yqtımaldyǵy basym ekendigin ashyp aıtqym keledi.

Bul jalǵan ómir synaq bolǵandyqtan, qazir barsyń sálden soń joqsyń. Bul ómirde atalǵan másele boıynsha júıkeme salmaq túsirgende emespin. Osy synaq bolyp jatqan jaǵdaı boıynsha eldiń eń basty betke tutar azamattarynyń aldyna baryp, jaǵdaıdy aıttym. «Adamnan suraǵannyń eki kózi shyǵady, Alladan suraǵannyń eki búıiri shyǵady» degen ustanymdy eskerip, olardan birdeńe dámetip emes, osyndaı shekten shyqqan ádiletsizdikterge qarsy ne ister eken dep synap shyqtym. Elimizdegi ádiletsizdikterge qarsy kúresýshi, demokratııanyń uıytqysy sanalǵan azamattar men zııalylar, bedeldi degen qoǵam-memleket qaıratkerleri, sheneýnikteri de bar arasynda. О́kinishke oraı, yrymǵa selk etken bireýin kórmedim. Tek qaraqan basynyń máselesi ǵana qyzyqtyrardaı áser qaldyrdy. Iаǵnı qoǵamymyzdaǵy jaǵdaıǵa, ádiletsizdikterge bas qatyrar basshylar, zııalylar joq desek te bolady. Sondyqtan bolar qoǵamymyzda kóz kórip, qulaq estimegen jaýyzdyqtar men osyndaı bassyzdyqtar beleń aldy dep oılaımyn. Sebebi qoǵamnyń ol dertin emder azamattary, zııalylary, basshylary joqtyń qasy.

Osy kishkentaı bolǵan jaǵdaı arqyly qoǵamymyzda qalyptasqan qıyn jaǵdaıdy halyqqa jetkizýdi jáne jetkizýshi jýrnalısterge qarata hat joldaǵandy jón kórdim.

Qoryta aıtqanda, jýrnalıster qaýymyna – Sizderge qarata bul jaǵdaıdy baıandap jatqandaǵy basty maqsatym, eger de sot organdarynan, jalpy memlekettiń barlyq organdarynan esh ádilettik taba almaı jatsam, sońyna deıin kúresetinimdi jetkizseńizder. Qoǵamda bolyp jatqan páterin tartyp alý kezinde joǵary qabattan óz ózin tastaý ne óz ózin órteý sekildi áreketter jasaı almaımyn, qolymnan kelmeıdi. Kerisinshe shekten shyqqan ádiletsizdikterdi jasap, qylmys álemin quryp qoǵamnyń berekesin ketirip jatqan, qyzmet babyn paıdalanyp azamattardyń zańdy páterin tartyp alyp jatqandardy eldiń bolashaǵy úshin, tynyshtyǵy úshin jazalap, ádilettik ornatý úshin sońyna deıin kúresetinimdi jáne osy jolda meni atyp tastap, artynsha terrorıst etip, máseleni jaýyp tastamaýy úshin osylaı aldyn ala jaǵdaıdy jarııalap otyrmyn. Sebebi jaǵdaıdy jarııalamastan kúresken 3 jyl ishinde túsindim, bular eshnárseden taıynbaıdy eken. Eger de osy máseleni Sizder – jýrnalıster qaýymy qoǵamǵa jetkizseńizder jáne men erteń qurban bolyp jatsam, túpki sebebin  bilseńizder jáne elimizde ádilettik ornatý úshin halyqty jumyldyrýǵa atsalyssańyzdar. Aldaǵy ýaqytta shekten shyqqan ádiletsizdikter tóńireginde halyq uıysyp, bir ózgeris bola ma degen úmitim bar.

08.04.2013