Qazaqstandyq baılardyń aqshasy 100 myń jetimdi 50 jyl asyraýǵa jetedi

Qazaqstanda bir-birimen joldary múlde toǵyspaıtyn eki sanattaǵy adamdar bar ekenin biletin bolarsyz. Baılar men kedeılerdi meńzep otyrmyn. Eki sanattaǵylar eki bólek álemde ómir súretinder. Baılar baıyǵan ústine baıyp, kedeılerdiń jaǵdaıy turaqty bolyp turatyn, kádimgi bizdiń kúndelikti ómirimiz. Já, áńgime negizi - basqada.

Men qaltalylardyń qaltasyndaǵy qarajatty qyzǵanyp nemese kedeılerdi músirkeıin dep otyrǵan joqpyn. Jaqynda mynadaı eki aqparatty kózim shalyp qaldy.

Sonyń birinshisi:

Forbes.kz basylymy Qazaqstannyń eń baı 50 adamynyń tizimin jarııalaǵan bolatyn. Bul áleýettik jelilerde qyzý talqyǵa túsken soń, "Qamshy" portaly qazaqstandyq mıllıonerler men mıllıarderlerdiń bar baılyǵyn eseptep kórdi.

Sonymen, jeke qorynda mıllıard dollardan astam qarajaty bar alǵashqy bestikke tómendegi kisiler (baıbatshalar) kiredi eken:

1. Bolat О́temuratov - 2 600 000 000 dollar,
2. Ádiljan Ibragımov - 2 200 000 000 dollar,
3. Tımýr Qulybaev - 2 100 000 000 dollar,
4. Dınara Qulybaeva - 2 100 000 000 dollar,
5. Vladımır Kım - 1 800 000 000 dollar.

Al "Forbes" jarııalaǵan  Qazaqstandaǵy eń baı 50 adamnyń dollaryn paraqtap kórip ek, 25 519 000 000 boldy.

Ekinshi derek:

Qazaqstannyń resmı statıstıkasynda byltyrǵy men bıylǵy jyldyń ózinde 96 myń jetim bala anyqtalǵan. Árıne, jetimder úıin, ınternattardy panalap júrgen búldirshinderdi memleket qamqorlyǵyna alǵan.

Myna derekke nazar salyńyz. Osy ýaqytqa deıin 8 myńnan astam qazaq balasy shetelge satylyp ketken. Olar Qazaqstandy satyp ketken joq. Olardy Qazaqstan satyp jiberdi.

Endi kelesi derek. Qazaqstanda jylyna ár jetim balaǵa memleket bıýdjetinen 1 mıllıon teńge bólinedi. Iаǵnı, jetim balalardy asyraý úshin, olardyń kerek-jaraqtary úshin jyl saıyn 96 mıllıon teńge qarjy jumsalady degen sóz.

Birinshi jáne ekinshi derekterden túıgen oı:

Qazaqstandyq mıllıarderler men mıllıonerler qarjylaryn qazynaǵa sap, qazaqstandyq jetim balalardy qamqorlyǵyna alatyn bolsa, ne bolar edi?

25 mlrd. 519 mln. dollary bar baımyrzalar 96 myń jetim-jetimektiń 10 jyl boıǵy tirshiligine ne bary 5 mlrd. 760 mln. dollarry jumsalady eken. Iаǵnı, bizdiń saýsaqpen sanarlyq baılarymyzdyń qarajaty 100 myńǵa jýyq jetim balany 50 jyl boıy asyraýǵa jetedi.

Bulardan ózge, Qazaqstannyń syrtqy qaryzy 157 mıllıard dollar degen sumdyq aqparat taǵy bar. Qazaqstandaǵy áleýmettik jaǵdaıy ortadan tómen otbasylar men jumyssyzdar sany qanshama?! Baspanasyz jas otbasylar she?

Al baılardyń aqsha sanaýdan qoldary tımeı júr...

Nurgeldi Ábdiǵanıuly