Qyrǵyzstan Joǵarǵy keńesinde "Saltanat zańy" mysalǵa alyndy

Qyrǵyzstanda jasóspirimderge zorlyq-zombylyq kórsetý jáne adam óltirý faktisi boıynsha jaza qataıtý usynyldy. Joǵarǵy keńes depýtaty óz sózinde turmystyq zorlyq-zombylyqty qylmystyq jaýapkershilikke tartý týraly zań qabyldaǵan Qazaqstandy mysalǵa keltirdi.

"Qazaqstanda bir aıdan beri áıelin uryp óltirgen eks-mınıstr Qýandyq Bıshimbaevtyń ashyq sot otyrysy ótip jatyr. Sonyń negizinde Qazaqstanda el arasynda "Saltanat zańy" degen ataýǵa ıe bolǵan zań qabyldandy. Endi bireý bireýge qol kóterip, denesin sál kógertse de, qylmystyq is qozǵalady. Bizge de jazany qataıtatyn osyndaı zań kerek", – dedi Joǵarǵy keńes depýtaty Sharapatqan Májıtova. 

Eske sala keteıik, jaqynda prezıdent Qasym-Jomart Toqaev "Qazaqstan Respýblıkasynyń keıbir zańnamalyq aktilerine áıelderdiń quqyqtaryn jáne balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly" jáne "Respýblıkalyq kodekske ózgerister men tolyqtyrýlar engizý týraly" zańdarǵa qol qoıǵan bolatyn.