"Mambetter tili": Tıktok jelisinde qazaq tilin qorlaǵan kelinshek 2 jylǵa sottaldy

Jýrnalıst Mıhaıl Kozachkov telegram-arnasyndaǵy aqparatyna súıensek, Lıýdiń efırdegi sózi ınternette taralyp, áleýmettik jelini baqylaıtyn jedel ýákil ondaǵy alaýyzdyq belgilerin kórip, esep jazǵan.

Onyń  málimdeýinshe, Elına Lıý atty 21 jastaǵy kelinshek TikTok jelisinde tikeleı efırǵa kirip, on myńǵa jýyq kórermen jınaǵan. Sol kezde jeli qoldanýshylarynyń biri onyń ultyn surap, memlekettik tilde sóıleýin talap etken. 

Al oǵan tıktoker qazaq tilin jekkóretinin, jáne qazaq tili mambetter tili ekenin, mambetterdiń kesirinen Abaı kóshesinde keptelis bolatynyn aıtqan. 

"Men qazaq tilin unatpaımyn. Shynymdy aıtsam, bul mámbetter tili" deı otyryp, Lıý qazaq tilin unatpaıtynyn aıtyp, bul tilde tek aýyldan kelgen «mambetter» sóıleıtinin aıtqan (Eskertý! Sot «mambet» sózin qazaq ultyn jáne tilin kemsitý dep baǵalaǵan). 

«Sot Lıýdiń kinásiniń dáleldengeni týraly qorytyndyǵa kelip, ol óziniń is-áreketimen ultaralyq alaýyzdyqty týdyrǵanymen, ulttyq ar-namys pen qadir-qasıetti qorlaýmen, azamattardyń qazaq ulty ókilderiniń namysyna tıgen. Lıýdiń sózderi Qazaqstan Respýblıkasynyń azamattaryna azamattyq jáne saıası destrýktıvti kózqaras týdyrady», – delingen sot úkiminde.

Elına Lıý qylmystyq kodekstiń 174-baby "Áleýmettik, ulttyq, rýlyq, násildik, taptyq nemese dinı arazdyqty qozdyrý" boıynsha sottalyp, eki jyl eń tómengi qaýipsizdik kolonııasynda jazasyn óteıdi. 

Úkim zańdy kúshine engen joq.