Bilim salasynda 206 qylmystyq is tirkelgen

Spıkerdiń sózine súıensek, bilim berý salasynda 2023 jyldan bıylǵy jyldyń birinshi toqsanyna deıin eńbekaqy qoryndaǵy qarajatty urlaýǵa qatysty birqatar turaqty qylmystyq is-áreket áshkerelengen.

«Esepshiler mekteptegi býhgalterlik esep júıesi, ulttyq bilim berý derekter bazasy jáne tutynýshylardyń qazyna júıesi arasyndaǵy ıntegrasııanyń joqtyǵyn paıdalanyp, tólem qujattaryna qolmen túzetýler engizip, bıýdjet aqshasyn jymqyrǵan. Urlyq maqsatyndaǵy qarajat jyl saıynǵy bıýdjettik ótinimderdi jasaý kezinde de kepilge qoıylǵan», – dedi spıker brıfıng barysynda.

Danııar Bıǵaıdarov bul urlyq shemasy arqyly olar belgilengen normadan asatyn jalaqyny bógde tulǵalar men qaıtys bolǵan jandarǵa aýdarǵanyn habarlady. Osyǵan baılanysty memleket qazynasyna 15 aıda 14 mıllıard teńge zalal keltirgen.

«Agenttik bilim berý salasynda osyndaı 206 qylmystyq isti tirkedi. Bul boıynsha keltirilgen zalal 14 mlrd teńgeden asady. Jalpy, urlyqtyń eń kóp mólsheri Túrkistan, Jetisý, Qyzylorda, Almaty, Aqtóbe oblystarynda jáne Almaty qalasynda tirkelgen. Urlyq faktileri áli de anyqtalýda.

Máselen, «Jaqynda ǵana Jetisý óńiri boıynsha sybaılas jemqorlyqqa qarsy qyzmet Sarqan aýdandyq bilim basqarmasynyń bıýdjettik bólimi basshysynyń zańsyz áreketin toqtatty. Ol osy bólimniń esepshileriniń shotyna artyq belgilengen jalaqyny zańsyz aýdarý jolymen asa iri mólsherde 1 mlrd teńge somasynda bıýdjet qarajatyn jymqyrdy degen kúdikke ilindi», — dep jalǵastyrdy ol.

Antıkordyń habarlaýynsha, tergeý amaldary barysynda 156 mıllıon teńge kólemindegi qarajat anyqtalyp, tárkilengen. Kúdikti sot sanksııasymen qamaýǵa alyndy. Bul is boıynsha tergeý jalǵasýda.

«4 sáýirde Jańaqorǵan soty aýdandyq bilim bóliminiń basshysy Ibragımovke, MM bas esepshisi Aıazbaevaǵa jáne 24 mektep esepshisine qatysty shyǵarǵan úkimi zańdy kúshine enip, olar erekshe tártipte bıýdjet qarajatyn urlaǵany úshin kináli dep tanyldy. Olar jalpy somasy 1 mlrd teńgeden asatyn iri kólemdegi qarajat jymqyrǵan.

Sot úkimine sáıkes, basshy men atalǵan mekemeniń esepshileri 8 jylǵa, taǵy bir esepshi 7 jylǵa bas bostandyǵynan aıyrý jazasyna kesildi. Bul rette sottalǵandar memlekettik qyzmette jáne basqa da uıymdarda qyzmet etý quqyǵynan ómir boıyna aıyryldy», - dep túıindedi Danııar Bıǵaıdarov.