Parlament turmystyq zorlyq-zombylyq týraly zańdy qabyldady

Túzetýler memlekettik otbasylyq saıasattyń quqyqtyq, áleýmettik, ınstıtýsıonaldyq jáne ózge de negizderin jetildirýge, áıelderdiń quqyqtary men balalardyń qaýipsizdigin qorǵaýdy kúsheıtýge, olardyń qaýipsizdigin buzǵany úshin ákimshilik jáne qylmystyq jaýapkershilikti qataıtýǵa, otbasy men turmystaǵy zorlyq-zombylyqtyń aldyn alýǵa baǵyttalǵan.

"Memleket basshysy kámeletke tolmaǵandarǵa qatysty zorlyq-zombylyqtyń kez kelgen túri úshin jazany qatańdatýdy, sondaı-aq bilim berý mekemelerinde psıhologııalyq qoldaý qyzmetin ınstıtýsıonaldyq kúsheıtýdi, biryńǵaı senim telefonyn uıymdastyrýdy jáne qaraýǵa usynylǵan zańdarda kórinis tapqan zorlyq-zombylyq pen býllıng qurbandaryna kómek kórsetýdiń pármendi baǵdarlamasyn ázirleýdi tapsyrdy", - dedi Senat depýtaty Janna Asanova.

"Áıelderdiń quqyqtary men balalardyń qaýipsizdigin retteıtin" Zańmen Qylmystyq kodekske mynadaı ózgerister engiziledi:

• adamdardyń kámeletke tolmaǵandarǵa qatysty zorlyq-zombylyqqa baılanysty qylmystar kezinde kodekstiń erekshe bóliginde kózdelgennen neǵurlym jeńil jaza taǵaıyndaýǵa tyıym salý;
• taraptardyń kámeletke tolmaǵandarǵa qatysty zorlyq-zombylyqqa baılanysty qylmystar boıynsha, sondaı-aq Kodekstiń 108-1 ("Densaýlyqqa qasaqana jeńil zııan keltirý") jáne 109-1 ("Uryp-soǵý") - baptarynda kózdelgen qylmystyq quqyq buzýshylyqtar tatýlasqannan keıin bir jyldan keıin qaıtalap jasalǵan jaǵdaılarda tatýlasýyna jol berilmeıdi;
• densaýlyqqa qasaqana aýyr zııan keltirýge, densaýlyǵyna aýyrlyǵy ortasha zııan keltirýge baǵyttalǵan is-áreketter úshin bas bostandyǵyn shekteý túrindegi balamaly jaza alynyp tastalady jáne bas bostandyǵynan aıyrý túrindegi jaza belgilenedi;
• kámeletke tolmaǵan adamdy óltirgeni úshin (QK-niń 99-baby), kámeletke tolmaǵanǵa qatysty zorlaý jasaǵany úshin (QK-niń 120-baby) jáne kámeletke tolmaǵanǵa qatysty jynystyq sıpattaǵy zorlyq-zombylyq áreketteri úshin (QK-niń 121-baby) QK-niń qoldanystaǵy normalarynda kózdelgen basqa balama jazalaý sharalaryn alyp tastaý arqyly ómir boıyna bas bostandyǵynan aıyrý túrindegi jaza belgilenedi;
• 16 jasqa tolmaǵan adamdarǵa jynystyq sıpattaǵy tıisý úshin jaýapkershilik engiziledi;
• ózin-ózi óltirýge ıtermeleý nemese kómektesý úshin jaza belgileıdi;
• qylmystyq quqyq buzýshylyq jasaǵan adamnyń minez-qulqyna sot qoldanatyn erekshe talaptardy belgileıtin jańa bap engizildi;
• Senat depýtattary zańdy birinshi jáne ekinshi oqylymda maquldaýǵa daýys berdi. Qujat Prezıdettiń qol qoıýyna jiberiledi. Ol qol qoıylǵannan keıin kúshine enedi.