Qoshanov: Prezıdent reformalarynyń maqsaty – zań aldynda jalpyǵa birdeı teńdikti qamtamasyz etý

«Zań men tártip ústemdigi» degenimiz ne jáne onyń ádildikti túsinýge qandaı qatysy bar, bul týraly Májilis tóraǵasy Erlan Qoshanov «Kazahstanskaıa pravda» gazetine bergen suhbatynda aıtyp berdi. Suhbat Prezıdent Qasym-Jomart Toqaevtyń ınaýgýrasııasynyń ótkenine bir jyl tolýyna oraılastyrylyp otyr.

«Bizdiń maqsatymyz – mártebesine, qaltasynyń qalyńdyǵyna, shyqqan  tegine qaramastan zań aldynda jalpyǵa birdeı teńdikti qamtamasyz etý. Bul máseleniń bir bóligi. Al ekinshisi, qoǵamdaǵy kez kelgen quqyq buzýshylyq úshin jazanyń bultartpastyǵy qaǵıdasyn saqtaý», – dep Májilis spıkeri jýrnalıstiń suraǵyna jaýap berdi.

Oǵan mysal retinde Palata tóraǵasy jemqor olıgarhtar men joǵary laýazymdy sheneýnikterge baǵyttalǵan «Aktıvterdi qaıtarý týraly» zańǵa toqtaldy. Erlan Qoshanovtyń aıtýynsha,  qazir memlekettiń aldynda turǵan basty mindet – urlanǵan qarajat pen múlikti halyqqa qaıtarý. «Bul qoǵamǵa belgi bergendeı boldy – biz ol adamdy kim nemese kimniń adamy ekenine qaramadyq. Zań ústemdigi degen osy», – dedi Palata spıkeri.

Saıasatker muny qazaqstandyqtarǵa kez kelgen aýyr qylmys kishigirim buzaqylyqtardan bastalatynyn túsindiretin ıdeologııalyq mindet dep biledi. Onyń aıtýynsha, búginde quqyqtyq nıgılızm qoǵamnyń belgili bir bóliginde tamyr jaıyp bara jatyr, adamdar kóz aldynda bolyp jatqan qylmystyq áreketterge beı-jaı qaraıtyn boldy.

«Qylmystyq oqıǵa týraly ne úshin habarlaý kerek? Kórshiniń áıelin uryp-soǵatynyn, podezge sýret salǵanyn nemese qoqys tastaıtynyn nege quqyq qorǵaý organdaryna aıtýymyz qajet? Keıbir adamdardyń únsiz qalýy, ol báribir eshteńeni ózgertpeıdi dep oılaıdy. Endi bireýler quqyq qorǵaý organdarymen baılanystan aýlaq bolýdy qalaıdy nemese  mundaı áreketterdi durys dep qabyldamaýy múmkin. Biraq biz qazaqstandyqtarǵa kez kelgen aýyr qylmystyń usaq-túıek buzaqylyqtardan bastalatynyn túsindirýimiz kerek. Eger kishigirim qylmystyq áreketi úshin jazalanbaı, jaýapkershilikten jaltaryp ketse, ony qalypty jaǵdaıdaı kórip, kelesi joly da  jaýapkershilikten ońaı qutylamyn degen oıdy sanasyna sińire bastaıdy», – dedi Erlan Qoshanov.

Osy oraıda ol qoǵamdyq baqylaý men azamattyq belsendiliktiń mańyzdylyǵyn atap ótti.

«Biz ár úıge, ár páterge beınebaqylaý kamerasyn ornata almaımyz. Sondyqtan ár azamat aınalasynda bolyp jatqan jaǵdaılarǵa baı-jaı qaramaýy kerek. Men muny jalpyǵa birdeı qamqorlyq jáne ózara jaýapkershilik ıdeıasy dep atar edim. Bul zań ústemdigimen qatar negizgi ıdeologııalyq baǵytymyz bolýy kerek. Bul týraly Prezıdent Respýblıka kúnine arnalǵan saltanatty jıynda da aıtqan bolatyn», – dedi Májilis spıkeri.