Abaı oblysynda qurylys jumysy qyzý júrip jatyr

Oblysta oqýshy oryn tapshylyǵyn azaıtý úshin «Jaıly mektep» jobasy aıasynda 2025 jylǵa deıin 5700 oryndyq 11 mektep salynady. Jobany 2023 jyly júzege asyrýǵa Qazaqstan Respýblıkasynyń Ulttyq qorynan 8 mıllıard teńgeden astam qarjy bólingen. Bul týraly Ortalyq Kommýnıkasııalar qyzmetiniń baspasóz máslıhatynda oblys ákimi málimdedi.

Qazirgi tańda Semeı qalasynyń ártúrli aýdanynda: Qaraǵaıly shaǵyn aýdanynda 1200 oryndyq, Vodnyı kentinde 600 oryndyq, Aqsýat aýylynda 300 oryndyq 5 mekteptiń, Besqaraǵaı aýylynda 300 oryndyq, al Aıagóz qalasynyń «Et kombınaty» shaǵyn aýdanynda 600 oryndyq mektep qurylysy qarqyndy júrip jatyr. 2025 jylǵa deıin Bilim berý ınfraqurylymyn qoldaý Qorynyń qarajaty esebinen 6 shaǵyn mektep, jáne jumys istep turǵan mektepterge 6 qosymsha qurylys salynatyn bolady.

Balalardy qosymsha bilimmen jan-jaqty qamtý maqsatynda kópbeıindi Oqýshylar saraıyn salýdy josparlanǵan. Búginde qurylys jobasy ázirlenip, memlekettik saraptama qorytyndysy alyndy. Jobanyń jalpy quny 11,4 mlrd teńge.

Prezıdent tapsyrmasyna sáıkes Shákárim ýnıversıtetinde «Shakarim High School» jáne Á.Bókeıhan ýnıversıtetinde «Abay IT-School» mektepteri ashylyp, oblys joǵary oqý oryndaryna qosymsha 500 arnaýly bilim granty bólindi.

Sonymen qatar, 2025 jylǵa qaraı Abaı oblysynda 65 alǵashqy medısınalyq-sanıtarlyq kómek kórsetý nysanyn salý josparlanǵan. Nysandar «Aýyldyq densaýlyq saqtaýdy jańǵyrtý» jobasy aıasynda júzege asady.

О́ńirdi damytýdyń keshendi josparyna Semeı qalasyndaǵy quny 100,4 mlrd teńge bolatyn bes medısınalyq mekeme engizilgen. Onyń ishinde: 400 oryndyq kópsalaly aýrýhana, 300 oryndyq kópsalaly balalar aýrýhanasy, oblystyq qan ortalyǵy, Semeı qalasynyń oń  jáne sol jaǵalaýyndaǵy emhanalar.

Aıta ketsek, 2023 jyly Abaı oblysynda 235 shaqyrym jergilikti mańyzy bar jolǵa ortasha jóndeý jumystary júrgizilip, oǵan 9,9 mlrd teńge bólingen. «Aýyl – El besigi» baǵdarlamasy aıasynda jalpy uzyndyǵy 77 shaqyrymdy quraıtyn aýylishilik joldardy ortasha jóndeý jumystary júrgizildi. Jyl sońyna deıin joldardyń 90% standartty jaǵdaıǵa jetip, 2025 jylǵa qaraı bul kórsetkishti 97% jetkizý josparlanǵan.