Nazarbaev atyndaǵy kósheler qala bere me?

Sarapshy, qoǵam belsendisi Qazbek Beısebaevqa Almatydaǵy "Jibek joly" stansasynyń aldynda bir jigit jaqyndap kelip, suraǵan eken:

– Keshiresiz, Nazarbaev kóshesi qaı jaqta?

"Onyń atyn atamashy", – dedim de, ana jaqta dep kórsettim, deıdi post avtory.

Jigit biraz sasyp qaldy da, sosyn qolyndaǵy telefonyn kórsetip: "renjimeńiz aǵa, solaı jazylyp tur", dep aqtalypty.

"Munda seniń de, meniń kinám joq" dep, metroǵa kirip ketken sarapshy "Negizinde sol kósheniń ataýy týraly suraqty taǵy kóterý kerek", degen oı tastapty.

Ras-aý, bul qazaq úshin mańyzdy suraq!

• Nazarbaev atyndaǵy kósheler Qazaqstanda tura bere me?
• Eger tura berse, bul elimizdiń bar saıasaty da, baǵyty da burynǵy súrleýine qaıta túsedi degendi meńzeý me?

Bas qalaǵa sumdyq pafospen berilgen Nur-Sultan ataýyn qańtar oqıǵasynan keıin jalma-jan alyp tastady "Jańa Qazaqstan" bıligi. Taldyqorǵanda qulaǵan eskertkishti ornyna qaıta ornatpady.

Biraq Astana áýejaıynda Nazarbaevtyń esimi qaldy, Almatydaǵy Nazarbaev kóshesindegi taqtaıshalardy halyq shaǵyp tastasa da, qala bıligi qalpyna keltirip qoıdy.

Qolǵa alǵan isiniń bárin shala atqaryp, sońyna deıin tyndyrmaıtyn bılik bul jerde de Nazarbaevtyń murasynan arylýdy adýynmen bastap, aqyr sońynda artqa sheginip qaldy-aý.

Tarıhta bolǵany ras, tulǵa bolǵany ras, biraq kez-kelgen deni durys ult óz tarıhynyń jamanyn jasyryp, jaqsylyǵyn asyrýǵa umtylmaı ma?

Qazaqstan kóshelerinen Nazarbaevtyń esimin alyp tastasaq, Toqaev pen Dosaevqa "qarapaıym zeınetker" Nazarbaev kelip ákireńdemeıtin shyǵar?

Qysqasy, bul máseleni áli de kóterý kerek. Nazarbaev esiminiń ornyna laıyq ataý da daıyn: byltyr "Oyan, Qazaqstan" qozǵalysy Almatydaǵy Nazarbaev dańǵylyn Qańtar dep ózgertýdi talap etip aksııa ótkizgeni bar. 

Áıtpese áne, áli de kóńili kónshimeı júrgen qazaqtar bar eken!