Beısen Quranbektiń áıeli: Dúnıeden óter kezindegi sońǵy oılaryn ǵana jetkizsem deımin

Tórtinshi kún, Beısenin joqtaǵan halqynyń kóz jasy toqtar emes. Egilgen aǵaıynǵa Beısekeńniń jary Gúlmıra basý aıtypty.

“ARDAQTYM, AZAMATYM, ASYL JARYM...”
⠀
О́mirden ótti... Máńgilik mekenine jetti... Ol kisiniń demi úzilse, meniń de tynysym toqtaıtyndaı kórinetin. Alaıda keýdemdegi janym shyqpaǵan soń, tiri adam tirshiligin jasaı beredi demekshi, basymdy kóterip, aınalama qaraýyma týra keldi. Allanyń isine kóndim.
⠀
Beısekemniń artynan qaza qaıyrly bolsyn aıtyp jatqan adamnyń sanynda esep joq, qalyń qazaq qabyrǵasy qaıysyp, kóńil aıtýda. Elimizdiń ıgi jaqsylary lebizderin bildirip, jedelhattar joldap jatyr.
⠀
Áleýmettik jelilerdegi jazbalar, arnaýlar men kommentarıılerdi beı-jaı oqý múmkin emes, júregińdi qan jylatady degen aǵaıynnyń ózara áńgimesin úsh kúnnen beri estýdemin. Olardyń barlyǵyn ashyp oqýǵa júıkem shydamady... áıtse de keshe birqataryn kórdim, túsindim. Kórermen qaýym, jora-joldas, maıdandas áriptester, úlgi tutyp sońynan ergen jastar qandaı tulǵadan aırylyp qalǵanyn sózben jetkize almaı, zar ılep joqtap jatyr.
⠀
Telearnalar Bekeń týraly sıýjetteri men habarlaryn jedel túrde daıyndap, halyq nazaryna usynyp, ystyq yqylastaryn bildirýde. Alys-jaqyn shetelderdegi baýyrlar da orny tolmas qaıǵyǵa ortaqtasýda. Barshańyzǵa áýletimizdiń atynan alǵysymdy bildiremin.
⠀
Beısekemniń maqtaýyn jetkizip, boıaýdy aıamaı, ásirelep aıta bersem bolar edi, biraq, Qudaıǵa shúkir, ony menen neshe ese artyq jaqsy jetkizetin adamdar barshylyq. Ári onyń shynaıy beınesin betpe bet kezdeskende de, kógildir ekrannan da ózderińiz kórip, baǵasyn berip jatyrsyzdar. Sondyqtan men onyń osy dúnıeden shyn dúnıege óter kezindegi sońǵy oılaryn ǵana jetkizsem deımin.
⠀
Ol uzaq aýyrdy, aýrýdyń jaqsysy joq, alaıda naq osy dert adamnyń sabyrlylyǵy men tózimin synaýǵa arnalǵan ba degen oıǵa qaldym. Aýrý dendep, deneni qursap, qınap jatsa da, Beısekem qabaǵyn bir shytpady, «myna aýrý pále boldy, sharshatty» degendi aıtpady. Dúnıeden ozý osyndaı da bolady eken...
⠀
«Qudaıym meni qaı kezde alamyn dese de daıynmyn. Allanyń maǵan násip etken ómirine de, synaǵyna da razymyn. Men jaqsy ómir súrdim. Maǵan Alla taǵala jaqsy ata-ana, janashyr baýyr, adal jar, súıkimdi bala syılady. On eki múshemdi saý qylyp, boıyma qýat berdi, mıyma sana, júregime rýh berdi. Basyma baq qondyrdy. El-jurtyma mańdaı terimdi sypyryp júrip qyzmet etýge múmkindik berdi. Taǵy ýaqyt berse, taǵy da aıanbaı qyzmet etýge daıarmyn. Meni jaqyndarymmen, balalarymmen synamaı, jeke basyma dert berip, óz denemmen synap jatqanyna taǵy da sheksiz rızamyn. RIZAMYN!»

Jazba Serik Ábikenulynyń facebook paraqshasynan alynǵan