100 teńge emes, 5000 teńge. Aımaǵambetov aqyly avtoturaqtarǵa qatysty oıyn aıtty

Depýtattyń sózinshe, Astanadaǵy kóptegen áleýmettik mańyzy bar jerde aqyly avtoturaqtardyń engizilýi, ásirese Botanıkalyq baq sııaqty oryndarda, qala turǵyndarynyń narazylyǵyn týdyryp otyr.

- Aqyly turaqtar kók syzyqtarmen belgilenedi, al turaqtyń bir saǵattyq quny 100 teńgeni quraıdy. Eger júrgizýshi belgi nemese tańbany baıqamasa, ol shamamen 5000 teńge aıyppul tóleýi múmkin. Qala ákiminiń orynbasarynyń málimetinshe, osy jyldyń 9 aıynda aqyly turaqtardan túsken aıyppul somasy 1,7 mıllıard teńgege jetken, - dedi ol Telegram-daǵy paraqshasynda.

Ashat Aımaǵambetov atap ótkendeı, degenmen bul júıeniń qarjylyq bóligi suraqtar týdyrdy. Árbir 100 teńgeden 70%-y turaqtardy basqaratyn jeke kompanııanyń úlesine tıedi, al 30%-y ǵana qalalyq bıýdjetke túsedi.

- Bul kiristerdiń bólinýi bizdiń komıtet depýtattarynyń arasynda qalalyq bıýdjet pen qoǵamdyq múddelerge saı keletin júıe týraly suraqtar týyndatty. Monopolıst kompanııanyń ıeleri týraly aqparat ta suratyldy. Mundaı sharalar qala turǵyndarynyń narazylyǵyn týdyryp jatyr. Qala bıýdjetine bul tólemderden úlkenirek, kem degende 90% túsip, sondaı-aq qoǵamdyq paıdalanýǵa arnalǵan oryndarda tegin avtoturaqtar sanyn kóbeıtý kerek dep sanaımyz, - dep aıtty depýtat.