Joǵarǵy sot Qazaqstanda hıdjab kıetinderdi mektepke kirgizbeý zańsyz dep tapty

Quqyq qorǵaýshy Jaslan Aımaǵanbetov Instagram paraqshasynda Joǵarǵy sot oblystyq sottyń sheshimin buzyp tastaǵanyn aıtty.

"Joǵarǵy sot qyzdardyń mektepte oramal taqqanyna baılanysty balalardyń bilim alý quqyǵy men oramal máselesine núkte qoıdy. Joǵarǵy Soty oblystyq sottyń sheshimin buzyp, oqýshynyń oramalyna baılanysty shekteýler bilim alý quqyǵyn buzady dep tanydy. Balalardyń quqyqtaryn qorǵaýǵa birneshe zańger men belsendiler qatysty", – deıdi quqyq qorǵaýshy.

Onyń aıtýynsha, mundaı sheshimderdi buǵan deıin tórt oblystyń sottary da moıyndaǵan.

"Mınıstrlik oramalmen kúresip jatqanda, Qazaqstanda balalar arasyndaǵy sýısıd pen zorlyq-zombylyq kóbeıip ketti, bul óte ókinishti. Qalaı bolǵanda da, sot bıligi mınıstrliktiń ustanymyna emes, zań normalaryna qaraıtyny jaqsy", – dedi ol.

Quqyq qorǵaýshynyń jazbasy jelide daý týdyrdy. Bireýler Joǵarǵy sottyń sheshimin qoldasa, endi bireýleri qyzdar óskenshe oramal taqpaýy kerek dep esepteıdi.

"Balaǵa mektepte oramal taǵyp qajet emes dep oılaımyn. Qazir balalar óte qatygez, olar muny mazaq qylýy múmkin. Ekinshiden, bul qyzdyń emes, ata-anasynyń qalaýy. Qyz óssin, oramal taǵa ma, joq pa, ózi sheshedi”, – dedi jeli qoldanýshysy.

Taǵy bir qoldanýshysy balanyń eseıgenin kútpeı, kózqarasyn qalyptastyra berý kerek dep sanaıdy.

Oqý-aǵartý mınıstri Ǵanı Beısembaev bilim oshaqtarynda barlyq oqýshynyń mektep formasyn kııýi mańyzdy ekenin aıtqan. Bilim salasyna qatysty máselelerdi basqa aspektilermen shatastyrmaý keregin túsindirdi.

Egov.kz memlekettik portaly mektep qabyrǵasynda hıdjab kııýge tyıym salý eshbir dinge basymdyq bermeı, zaıyrlylyq qaǵıdattarynp, ishki tártibin saqtaý úshin engizilgenin habarlaıdy.

Buǵan deıin Bas múftı Naýryzbaı qajy Taǵanuly oramaldy qyzdardyń tańdaýyn qurmettep, olardy shektemeý keregin aıtty.